येऊरमध्ये सहा वर्षांपूर्वी आईपासून ताटातूट झाल्यानंतर संजय गांधी राष्ट्रीय उद्यानात वास्तव्याला असणाऱ्या ‘बिट्टू बॉस’ या बिबट्याचा शनिवारी मृत्यू झाला. परिवहन मंत्री प्रताप सरनाईक यांनी या बछड्याला दत्तक योजनेंतर्गत दत्तक घेतले होते. मूत्रपिंडाच्या आजारामुळे बिट्टू गेल्या दोन ते तीन महिन्यांपासून आजारी होता. अखेर शनिवारी त्याने अखेरचा श्वास घेतला. त्याच्या दुर्देवी मृत्यूने सरनाईक कुटुंबियांसह संजय गांधी राष्ट्रीय उद्यानाचे कर्मचारी आणि वन्यजीवप्रेमींनी हळहळ व्यक्त केली आहे.
येऊरच्या एअरफोर्स स्टेशनसमोर असलेल्या ओपन जिम शेजारी ३ डिसेंबर २०१९ रोजी मॉर्निंग वॉकसाठी आलेल्या नागरिकांना या बछड्याचे दर्शन झाले होते. वनविभागाच्या पथकाने त्याला ताब्यात घेतले. पुन्हा आईच्या कुशीत पाठवण्यासाठी रात्री त्याच ठिकाणी सोडून ट्रॅपकॅमेऱ्याची नजर ठेवली होती. मात्र मध्यरात्री त्याच्याजवळ आलेल्या आईने रेकी केली. पिल्लाच्या जवळही गेली. मात्र त्याला कुशीत न घेता ती जंगलामध्ये निघून गेली होती. त्यावेळी तब्बल आठ दिवस अशा पद्धतीने बछड्याच्या आईची शो धमोहीम सुरु होती. मात्र त्यात यश न आल्याने शोध मोहीम वनविभागाने आटोपती घेतली होती.