इन्स्टाग्रामवर अपलोड केलेल्या व्हिडीओवर आलेल्या आक्षेपार्ह प्रतिक्रिया काढून टाकण्यास अल्पवयीन तरुणाने नकार दिल्यामुळे संतापलेल्या २० ते २५ जणांच्या जमावाने त्याला जंगलात बोलावून लाथाबुक्क्यांनी मारहाण केली. तसेच, त्याचे कपडे फाडून धिंड काढली. तरुणाच्या तक्रारीवरून खडकपाडा पोलिसांनी गुन्हा दाखल करत १२ जणांना अटक केली आहे.
कल्याणमधील एका अल्पवयीन डिलिव्हरी बॉयने इन्स्टाग्राम अकाऊंटवर एक व्हिडीओ टाकला होता. त्याखाली काहींनी आक्षेपार्ह प्रतिक्रिया नोंदवल्या होत्या. या प्रतिक्रिया काढून टाकण्यास तरुणाने नकार दिल्याने त्याच्यात आणि काही जणांमध्ये वाद झाला. त्यानंतरही तरुणाने प्रतिक्रिया न काढल्याने कल्याणमधील काही महिला आणि तरुणांनी त्याचा शोध घेत चर्चा करण्यासाठी वडवली अटाळी परिसरातील जंगलात बोलावून घेतले. तिथे लाथा-बुक्क्यांनी बेदम मारहाण करण्याचा आल्याचा या तरुणाचा आरोप आहे. संतापलेला हा जमाव एवढ्यावरच न थांबता त्यांनी या तरुणाच्या अंगावरील कपडे फाडत त्याची धिंड काढली. तसेच त्याला माफी मागायला लावत त्याचा व्हिडीओ बनवला. तरुणाच्या तक्रारीनंतर पोलिसांनी २० ते २५ जणांच्या जमावाविरोधात अॅट्रॉसिटी कायद्यासह मारहाण केल्याप्रकरणी गुन्हा दाखल करत १२ जणांना अटक केली.या तरुणाला इन्स्टाग्रामवरील देवेते विषयीच्या आक्षेपार्ह भाष्यावरुन २० ते २५ जणांच्या तरुणांनी लाथाबुक्क्यांनी बेदम मारहाण केली. संबंधित घटनेवर सोशल मीडियावर काही दिवसांपासूनच तीव्र संताप व्यक्त केला जात होता. काही लोकांनी याबाबत निषेध व्यक्त केला होता. अखेर त्या तरुणाचा शोध लागल्याने प्रकरण जरा निवळले आहे.