जळगाव महापालिका मार्केटमधील भाडे कराराची मुदत संपलेल्या गाळ्यांपोटी प्रीमियम घेण्यासंदर्भात भाजपकडून नवीन प्रस्ताव तयार करण्यात आला आहे. त्यात मूळ नकाशानुसार मोजणी करून सन २०१२ चा रेडी रेकनरनुसार प्रीमियम आकारणी करावी, असे म्हटले आहे. परंतु, या प्रस्तावानुसार महापालिकेला पूर्वी मंजूर झालेल्या ठरावापेक्षा कमी उत्पन्न मिळणार आहे. त्यामुळे कायदेशीर अडचणींच्या भीतीपोटी नगरसेवक नवीन प्रस्तावाला पाठिंबा द्यायला तयार नाहीत. त्यामुळेच हा प्रस्ताव महासभेत येऊ शकला नाही. आता त्यासाठी पालकमंत्री एकनाथ खडसे व्यापारी व सर्वपक्षीय नगरसेवकांची बैठक घेणार आहेत. मात्र, कायद्याच्या चौकटीत प्रस्ताव असेल तरच त्याला पाठिंबा देऊ या भूमिकेवर नगरसेवक ठाम आहेत आणि त्यानंतरही जर पक्षाने मंजुरी देण्यासाठी दबाव टाकण्याचा प्रयत्न केला तर राजीनामा देऊ या निर्णयाप्रत हे नगरसेवक आले आहेत, अशी माहिती सूत्रांनी दिली.
दबाव टाकाल तर राजीनामा देऊ!
महापालिका मार्केटमधील भाडे कराराची मुदत संपलेल्या गाळ्यांच्या प्रीमियमबाबतचा यादी प्रस्ताव नगरसेवकांच्या विरोधामुळे भाजपला महासभेत मांडता आला नाही. त्यामुळे या प्रस्तावासाठी विशेष महासभा घेण्याचे घाटत असताना भाजप नगरसेवकांनी मात्र, आपला विरोध कायम ठेवला आहे तरीही दबाव टाकला गेला तर राजीनामा देऊ या निर्णयाप्रत हे नगरसेवक आले आहेत. यासंदर्भात ते लवकरच पक्षाचे नेते एकनाथ खडसे यांच्याकडे भूमिका मांडणार आहेत.