स्वीस बँकेत खाते असलेल्या परदेशी खातेधारकांमध्ये दोन भारतीय महिलांचा समावेश असल्याची प्राथमिक माहिती समोर आली आहे. स्वित्झर्लंड सरकारने अधिकृतपणे प्रसिद्ध केलेल्या गॅझेटमध्ये परदेशी खातेधारकांची माहिती देण्यात आली आहे.
‘स्वीस फेडरल टॅक्स अॅडमिनस्ट्रेशन’ने (एफटीए) चाळीस परदेशी नागरिकांना अंतिम नोटीस पाठविली असून त्यात दोन भारतीय महिलांचा समावेश आहे. त्या दोन भारतीय महिलांना तीस दिवसांत याचिका दाखल करण्याचे आदेश दिले आहेत. ‘संबंधित महिलांच्या खात्यांचे व्यवहार आणि इतर माहिती भारत सरकारला देण्यात येऊ नये, असे जर संबंधित महिलांना वाटत नसेल, तर त्यांनी तीस दिवसांच्या आता याचिका दाखल करावी,’ असे ‘एफटीए’ने म्हटले आहे. अन्यथा भारत सरकारशी झालेल्या करारानुसार ‘त्या’ महिलांच्या खात्यांची माहिती भारत सरकारला द्यावीच लागेल, असेही स्पष्ट करण्यात आले आहे.
‘एफटीए’ने जारी केलेल्या यादीत ब्रिटन, रशिया आणि स्पेनच्या नागरिकांचाही समावेश आहे. मात्र, अमेरिकी आणि इस्रायलच्या नागरिकांच्या यादीत फक्त आद्याक्षरे आणि जन्मतारीख देण्यात आली आहे. ‘त्या’ यादीत संबंधित भारतीय महिलांची फक्त जन्मतारीख जाहीर करण्यात आली असून इतर कोणतीही माहिती त्यात देण्यात आलेली नाही.