आई-वडिलांची हत्या करून तो दोन दिवस मृतदेहांसोबत होता, टिटवाळ्यातील धक्कादायक प्रकार

कल्याणजवळ टिटवाळा मांडा येथील पंचवटी चौकातील साई दर्पण इमारतीत धक्कादायक घटना घडली आहे. मुलानेच आपल्या जन्मदात्या आई-वडिलांची हत्या केली आहे. विशेष म्हणजे बहिणीने घटनेची माहिती पोलिसांना दिली. हत्येमागचं नेमकं कारण अद्याप समोर आलेलं नाही.

अशोक भोसले (वय ७० ) त्यांची पत्नी विजया भोसले (वय ६०) आणि त्यांचा मुलगा अनमोल ( वय ३७) हे असे हे कुटुंब साई दर्पण इमारतीत राहत होते. अनमोलचे लग्न झाले आहे आणि तो एका खासगी कंपनीत नोकरी करतो. आई-वडील मयत झाल्याचे अनमोलने गुरुवारी संध्याकाळच्या सुमारास त्याच्या बहिणीला सांगितले आणि घरी बोलावून घेतले. अनमोलची बहीण घरी आली आणि रक्ताच्या थारोळ्यात पडलेला आई-वडिलांचा मृतदेह पाहून तिला धक्काच बसला. घरात दुर्गंधी येत होती. अनमोल त्यांच्या शेजारीच बसला होता. सगळच संशयास्पद वाटल्याने तिने याबाबत टिटवाळा पोलिस ठाण्यात माहिती दिली.