करोना चौथ्या लाटेच्या शक्यतेच्या पार्श्वभूमीवर पालिका प्रशासनाने जम्बो करोना केंद्रे आणि खासगी रुग्णालयांना अलर्ट दिला आहे. संभाव्य वाढीव रुग्णसंख्येच्या अंदाजाने यंत्रणा सज्ज ठेवावी, तसेच वैद्यकीय मनुष्यबळ व इतर कर्मचारी नेमण्यात यावेत. अतिदक्षता उपचारांच्या रुग्णशय्या आणि त्यासाठी लागणारी वैद्यकीय यंत्रे उपलब्ध ठेवावीत. रुग्णसंख्या वाढली तर, अडचण होऊ नये, अशा सूचना प्रशासनाने केल्या आहेत.
सर्व भव्य करोनारुग्णालयांची संरचनात्मक तपासणी करावी. पावसाळी परिस्थितीत संरचनेचा कोणताही धोका उद्भवणार नाही, याची खातरजमा करावी, त्यासाठी संबंधित रुग्णालयांचे अधिष्ठाता आणि परिमंडळांचे उपायुक्त यांनी समन्वय राखून कार्यवाही पूर्ण करावी व संरचना स्थिरता प्रमाणपत्र प्राप्त करून घ्यावे. पावसाळी पाण्याचा उपसा करणारी यंत्रणा देखील तैनात करावी. पालिकेच्या सर्व नियमित प्रमुख रुग्णालयांनी वाढीव रुग्णसंख्या दाखल करून घेता येईल व त्यांच्यावर योग्य उपचार होतील, अशारितीने तयारी करावी, असे निर्देश देण्यात आले आहेत.
सर्व खासगी रुग्णालयांनी रुग्णांना दाखल करून घेण्यासंदर्भातील कार्यपद्धती, बाधितांवर उपचार करण्यासाठी शासनाच्या निर्णयानुसार आकारावयाचे दर याबाबत यापूर्वी दिलेले आदेश पुन्हा एकदा प्रसारित करण्याची सूचना पालिका आयुक्तांनी अतिरिक्त पालिका आयुक्त (पश्चिम उपनगरे) डॉ. संजीव कुमार यांना केली आहे.
वैद्यकीय औषधी दुकानांमधून विकल्या जाणाऱ्या टेस्टिंग करोना कीटची आकडेवारी पालिका प्रशासनाला प्राप्त व्हावी, यासाठी अतिरिक्त आयुक्तांच्या मार्गदर्शनाखाली कार्यपद्धती सुनिश्चित करण्यात यावी. तसेच करोना उपाययोजनांशी संबंधित तातडीचे प्रस्ताव प्राधान्याने मार्गी लावावेत, असेही प्रशासनाने म्हटले आहे.
– मध्यवर्ती खरेदी खात्यामार्फत सर्व रुग्णालयांनी गरजेइतका औषधसाठा खरेदी करावा.
– जिनोम सिक्वेसिंग करण्याची कार्यवाही नियमितपणे सुरू ठेवावी.
– झोपडपट्टी परिसरांमध्ये नियमितपणे संसर्ग प्रतिबंधक औषध फवारणी करण्यात यावी.
– सार्वजनिक प्रसाधनगृह, शौचालयांमध्ये दिवसातून किमान पाच वेळा जंतुनाशक औषध फवारणी झालीच पाहिजे.
– १२ ते १५ वर्षे वयोगटातील मुला-मुलींचे लसीकरण जास्तीत-जास्त संख्येने करण्यासाठी मोहीम हाती घ्यावी.
– १५ ते १८ वर्षे वयोगटातील मुला-मुलींचे जलदगतीने लसीकरण करावे.
– करोनासदृश्य लक्षणे आढळणाऱ्या व्यक्तिंची चाचणी बाह्यरुग्ण सेवा विभागांमध्ये करण्यात यावी