योगगुरू बाबा रामदेव यांनी मिहान येथील मेगा फूडपार्कच्या पहिल्या टप्प्यात ब्रेडचे उत्पादन सुरू करण्याचा निर्णय घेतला आहे. या फूडपार्कमध्ये सुरुवातीला फळांचा रस तयार होईल, अशी घोषणा झाली होती. आता निर्णय बदलला आहे.
आशियातील सर्वात मोठा फूडपार्क सुरू करण्याच्या संकल्पासह बाबा रामदेव यांनी मिहानमध्ये प्रकल्पाची पायाभरणी केली. सुरुवातीपासूनच अडथळ्यांचा सामना करावा लागणाऱ्या या प्रकल्पाला महाराष्ट्र विमानतळ विकास कंपनीने (एमएडीसी) ३१ डिसेंबर २०२१पर्यंत प्रकल्प सुरू करण्यास सांगितले होते. परंतु, पतंजली व्यवस्थापन ही मुदत पाळण्यात अपयशी ठरले. त्यानंतर एमएडीसीने मुदतवाढ देत शक्य तितक्या लवकर प्रकल्प सुरू करण्यास सांगितले. त्यानंतर आता येथे फ्लोअर मिल लावण्यात आली आहे. ज्याद्वारे ब्रेडचे उत्पादन घेण्यात येणार आहे. हरिद्वार येथील प्रकल्पातून ब्रेडची निर्मिती बंद करून मिहानमधील फूडपार्कला संपूर्ण केंद्रिकृत व्यवस्था उभारण्यात येणार आहे. पहिल्या टप्प्यातील ब्रेड निर्मितीसाठी चार हजार क्विंटल गव्हाची खरेदी करण्यात आली आहे. त्यानंतर पुढील टप्प्यात फळांपासून ज्युसची निर्मिती सुरू होणार आहे.
‘अनुकूल वातावरणाची निर्मिती’
पतंजली मुदत पाळण्यात अपयशी ठरले, पण त्यांनी मिहानमधील प्रकल्पासाठी आतापर्यंत चारशे ते पाचशे कोटींची गुंतवणूक केली आहे. अशास्थितीत त्यांच्यावर कारवाई केल्यास गुंतवणूकदारांमध्ये चांगला संदेश जाणार नाही. मिहान हे गुंतवणूकदार, उद्योजक यांना सहकार्य करत अनुकूल वातावरण तयार करण्यावर भर देत आहे. त्या अनुषंगाने शक्य ते सर्व प्रयत्न सुरू आहेत. अधिकाधिक नवीन प्रकल्प यावेत, त्यांना पोषक वातावरण येथे असावे यासाठी आम्ही कार्यरत आहोत असे, एमएडीसीचे उपाध्यक्ष तसेच व्यवस्थापकीय संचालक दीपक कपूर म्हणाले.