गेल्या अनेक वर्षांपासून वेतनवाढीसाठी आंदोलने, बंद, मोर्चा काढणाऱ्या बँक कर्मचाऱ्यांसाठी घसघशीत पगारवाढीची गुड न्यूज आली आहे. देशभरातील सुमारे दहा लाख बँक कर्मचाऱ्यांना १५ टक्के पगारवाढ देणारा ऐतिहासिक असा दहावा द्विपक्षीय करार नुकताच भारतीय बँक संघटना आणि सात कर्मचारी संघटनांमध्ये झाला. २५ राष्ट्रीयीकृत बँका आणि १८ खासगी बँकांमधील कर्मचाऱ्यांना या कराराचा लाभ मिळणार आहे. त्यातच दुसऱ्या व चौथ्या शनिवारी सुटी आणि १५ दिवसांच्या पॅटर्निटी रजेचा ‘बोनस’ही मिळाला आहे. सार्वजनिक क्षेत्रामधील बँका, जुन्या खासगी बँका आणि काही परदेशी बँकांमधील सुमारे दहा लाख कर्मचाऱ्यांना नव्या वेतन कराराचा लाभ होणार आहे. १ नोव्हेंबर २०१२ पासून ही वाढ लागू होईल. सर्वबँक संघटनांच्या संयुक्त संघटनेने गेली काही वर्षे दीर्घकाळ वेतनवाढीचा प्रश्न लावून धरला होता. कर्मचाऱ्यांना १५ टक्के पगारवाढ मिळण्यासाठी चालू वर्षाच्या २३ फेब्रुवारी रोजी एक करार करण्यात आला. त्यानुसार बँकिंग क्षेत्रावर दर वर्षी ४ हजार ७२५ कोटी रुपयांचा अतिरिक्त बोजा पडणार आहे. त्याशिवाय निवृत्तीनंतर मिळणाऱ्या फायदे धरून एकूण ८ हजार ३७० कोटी रुपयांचा भार पडणार आहे. नव्या वेतन करारानुसार अधिकारी स्तरावरील कर्मचाऱ्यांना विशेष भत्ते आणि महागाई भत्त्यासह १४ हजार ५०० ते ५२ हजार ००० रुपये ते २३,७०० ते ८५००० रुपयांदरम्यान वेतन मिळेल. अन्य कर्मचाऱ्यांचे पगार ७ हजार२०० ते १९ हजार ३०० रुपये, ११ हजार ७६५ ते ३१ हजार ५४० रुपये आणि ५ हजार ८५० ते ११ हजार ३५० रुपये; तसेच ९हजार५६० ते १८हजार५४५ रुपयांदरम्यान असतील.
दुसरा, चौथा शनिवार सुट्टी!
या कराराअंतर्गत बँक कर्मचाऱ्यांना महिन्यातील दुसऱ्या व चौथ्या शनिवारी सुट्टी मिळणार आहे. पहिला व दुसरा शनिवार नेहमीप्रमाणे कामाचे दिवस असतील. शनिवारच्या सुट्टीला रिझर्व्ह बँकेने मान्यता दिली असून, केंद्र सरकारची मंजुरी आल्यानंतर साधारणतः जुलैपासून कर्मचाऱ्यांना दोन शनिवारच्या सुट्ट्यांचा लाभ घेता येईल. दरम्यान, संबंधित बँकांच्या वेळांनुसार बँकेतील रोखीचे व्यवहार दुपारी दोन वाजल्यानंतर आणि सायंकाळी चार वाजल्यानंतर होणार नाहीत.
पॅटर्निटी रजा
कराराअंतर्गत बँक कर्मचाऱ्यांच्या कुटुंबीयांना मेडिकल इन्शुरन्स देण्यात येणार आहे; तसेच बँकेतील कर्मचाऱ्यांना पहिल्यांदाच १५ दिवसांची पॅटर्निटी रजा दिली जाणार आहे. गेल्या ३१ महिन्यांपासून या संदर्भातील बोलणी सुरू होती.