मुंबई पोलिसांनी रात्री उशिरा एका महिला डॉक्टरला अटक केली. बेदरकार आणि निष्काळपणे गाडी चालवल्या प्रकरणी तिला अटक केली आहे. या महिला डॉक्टरच्या गाडीच्या धडकेत दुचाकीवर असलेल्या एका २५ वर्षीय महिलेचा मृत्यू झाल्याची घटना घडली. याप्रकरणी मृत महिलेच्या भावाने पोलिसात डी.बी. मार्ग पोलिसात तक्रार केली आहे. मृत महिला एका खासगी कंपनीत काम करत होती. ती आपल्या लहान भावाबरोबर बाइकवरून जात असताना हा अपघात झाला.
सोमवारी संध्याकाळी साडेपाचच्या सुमारास चौपाटी भागात सुखसागर हॉटेल जंक्शनजवळ हा अपघात झाला. ‘महिला डॉक्टरने आमच्या गाडीला धडक दिली आणि बाइकचा तोल गेल्याने आम्ही रस्त्यावर घसरून पडलो. या अपघातात बहिणीला गंभीर मार लागला. यानंतर धडक देणारी महिला गाडीतून उरतली आणि आपण डॉक्टर असल्याचं सांगितलं. तिने बहिणीला उपचारासाठी चर्नी रोडच्या क्लिनीकमध्ये नेलं. पण त्यांनी बहिणीकडे दुर्लक्ष केल्याने तिची प्रकृती आणखी बिघडली. रात्री उशिरा तिला भाटीया हॉस्पिटलमध्ये उपचारासाठी नेण्यात आलं. पण तिथे तिचा मृत्यू झाला’, असं अपघातात मृत पावलेल्या महिलेचा भाऊ आकाश सिंग याने पोलिसांना सांगितलं.