राष्ट्रवादी काँग्रेसचे अध्यक्ष शरद पवार यांच्या ‘सिल्व्हर ओक’ या निवासस्थानाला लक्ष्य करून हिंसक आंदोलन करणाऱ्या आंदोलकांचा आणखी तीन अतिमहत्त्वाच्या व्यक्तींना लक्ष्य करण्याचा कट होता, असा दावा पोलिसांनी गुरुवारी मुंबई सत्र न्यायालयात लेखी म्हणण्याद्वारे केला.
आंदोलकांच्या जामीन अर्जांना विरोध दर्शवताना पोलिसांनी ही माहिती दिली. ‘एसटी महामंडळ कर्मचाऱ्यांच्या संपाचे नेतृत्व करणारे व हिंसक आंदोलनाच्या कटात सहभागी असलेले अॅड. गुणरत्न सदावर्ते; तसेच हिंसक आंदोलन करणारे ११५ कर्मचारी मोठ्या कटाचा भाग आहेत. त्यामुळे त्यांना जामीन मंजूर करू नये,’ अशी विनंतीही पोलिसांनी आपल्या उत्तरात केली आहे.
सदावर्ते यांनी अॅड. गिरीश कुलकर्णी यांच्यामार्फत, तर ११५ कर्मचाऱ्यांनी अॅड. नितीन सेजपाल यांच्यामार्फत जामीन मिळण्यासाठी अर्ज केले आहेत. त्यात उत्तरादाखल पोलिसांनी विशेष सरकारी वकील प्रदीप घरत यांच्यामार्फत लेखी म्हणणे मांडले. ‘सदावर्ते यांनी अटकेनंतर पोलिसांसमोर जबाब देताना आपण संपकरी एसटी कर्मचाऱ्यांची कोणताही मोबदला न घेता न्यायालयात बाजू मांडल्याचे म्हटले; परंतु, प्रत्यक्षात त्यांनी प्रत्येक संपकरी एसटी कर्मचाऱ्याकडून वर्गणी घेतली. ९० हजारहून अधिक कर्मचाऱ्यांकडून सुमारे दोन कोटी रुपये जमवल्याचे तपासात समोर आले आहे. या प्रकरणात साक्षीदार असलेल्या एका संपकरी कर्मचाऱ्याने आपण कर्मचाऱ्यांकडून ८५ लाख रुपये जमवून सदावर्ते यांना दिले, असे जबाबात म्हटले आहे. सदावर्ते यांनी संपाच्या काळातच या पैशांतून केरळमधून सेकंड हँड लिमोझिन कार विकत घेतली आणि भायखळा येथे एक गाळा विकत घेण्याची प्रक्रिया सुरू केली. त्यामुळे त्याकरिता या पैशांचा वापर केला का, याचाही पोलिस शोध घेत आहेत. त्यामुळे सदावर्ते यांना जामीन मंजूर करू नये; तसेच आंदोलकांनी प्रत्यक्ष हिंसाचारात भाग घेतला असल्याने त्यांनाही जामीन मंजूर करू नये,’ असे म्हणणे लेखी उत्तरात मांडले.
आज होणार सुनावणी
जामीन अर्जांवर गुरुवारी वेळेअभावी सुनावणी होऊ शकत नसल्याने शुक्रवारी (आज) सुनावणी घेण्याचे न्या. आर. एम. सदराणी यांनी निश्चित केले; परंतु, विशेष सरकारी वकील प्रदीप घरत यांना सकाळच्या वेळेत पनवेलमधील अश्विनी बिद्रे हत्याकांड प्रकरणाच्या सुनावणीसाठी हजर राहायचे असल्याने न्यायाधीशांनी त्यांना दुपारच्या सत्रात युक्तिवाद करण्याची मुभा दिली, तर अर्जदारांच्या वकिलांना सकाळच्या सत्रात युक्तिवाद करण्यास सांगितले.
सदावर्तेंना कोल्हापुरात कोठडी
कोल्हापूर : एस.टी. कर्मचारी संपातील वादग्रस्त वकील गुणरत्न सदावर्ते यांना कोल्हापुरातील जिल्हा व सत्र न्यायालयाचे मुख्य न्यायदंडाधिकारी व्ही. पी. गायकवाड यांनी सोमवारपर्यंत पोलिस कोठडी सुनावली. जातीय तेढ निर्माण करणारी वक्तव्ये केल्याबद्दल त्यांच्या विरोधात झालेल्या तक्रारीमुळे त्यांना अटक करण्यात आली होती. पोलिसांनी बुधवारी रात्री सदावर्ते यांना मुंबईतून ताब्यात घेतले. सकाळी त्यांना न्यायालयात हजर केले.