मुलाला मारण्याची धमकी देत पाचोरा तालुक्यातील एका गावात राहणाऱ्या २४ वर्षीय महिलेवर अत्याचार झाला आहे. तसेच महिलेला शिवीगाळ करुन मारहाण केली व पोलीस स्टेशनला तक्रार दिल्यास जिवे ठार मारण्याची धमकी दिल्याची केल्याची धक्कादायक घटना समोर आली आहे. याप्रकरणी गुरुवारी पाचोरा पोलीस ठाण्यात आठ जणांविरुद्ध गुन्हा दाखल करण्यात आला असून दोघांना अटक करण्यात आली आहे. अनिल देविदास काळे, संदीप जाधव, अशी अटकेतील दोघांची नावे आहेत.
धमकी देत केला अत्याचार…
पोलिसांकडून मिळालेली माहिती अशी की, २४ वर्षीय महिला ही बकरीचा चारा घेण्यासाठी गेली असता नितीन एकनाथ जाधव याने पिडीत महिलेस तिच्या मुलाला मारण्याची धमकी देत जबरदस्ती अत्याचार केला. या अत्याचाराबाबत पिडीत महिलेने आपल्या पतीस सांगितले. पिडीत महिलेच्या पतीने नितीन जाधव यास याबाबत विचारले असता त्याने त्याला देखील शिवीगाळ केली. तसेच १९ एप्रिल २०२२ रोजीच्या संध्याकाळी ६ वाजेच्या सुमारास आनिल काळे, संदीप जाधव आणि एका महिलेने पिडीतेच्या घरात घुसून शिवीगाळ करुन मारहाण केली. तसेच पोलीस स्टेशनला तक्रार दिल्यास जिवे ठार मारण्याची धमकी दिली.
एवढेच नव्हे तर अनिल काळे याने पिडीत महिलेस ‘शारीरीक संबंध करुन दे’, असे सांगुन साडी ओढली. तर संदीप जाधव याने पिडीतेचे ब्लाउज फाडले. तसेच नितीनचा पाहुणा भरत याने तिला शिवीगाळ केली.
तसेच नितीनचे नातेवाईक असलेल्या तीन महिलांनी तक्रार दाखल करु नये, म्हणुन पिडीतेला शिवीगाळ केली होती. तर अनिल देविदास कोळी यांच्या सांगण्यावरुन नितीन जाधवच्या पत्नीने पिडीतेच्या पती व नातेवाईकांविरुद्ध खोटी फिर्याद दाखल केली आहे. याप्रकरणी पाचोरा पोलीस ठाण्यात नितीन जाधव, संदीप जाधव, नितीनचा पाहुणा भरत, नितीनच्या नातेवाईक तीन महिला आणि अनिल देविदास काळे यांच्याविरुद्ध गुन्हा दाखल करण्यात आला असून अनिल देविदास काळे, संदीप जाधव या दोघांना अटक करण्यात आली आहे. पुढील तपास पोलीस उपनिरीक्षक विजया वसावे ह्या करीत आहेत.