नोकरीच्या आमिषाने फसवणूक करण्याचे गुन्हे पुण्यात दिवसागणिक वाढत आहेत. नामांकित कंपनीत ‘प्लेसमेंट’ करून देतो, पदेशात गलेलठ्ठ पगाराची नोकरी लावतो, सरकारी खात्यात नोकरी लावतो, असे आमिष दाखवून तरुण, तरुणींना जाळ्यात ओढले जात आहे. गेल्या वर्षात शहरात अशा प्रकारे ९०० गुन्ह्यांची नोंद झाली असून, त्यामध्ये एक हजारांहून अधिक तरुणांची ८५ कोटी रुपयांची फसवणूक झाली आहे.
पुणे हे शिक्षणाचे माहेरघर; तसेच ‘ आयटी सिटी’ म्हणून प्रसिद्ध आहे. दर्जेदार व सर्व प्रकारच्या शिक्षणाची व्यवस्था आणि त्याचबरोबर नोकरीच्या विविध संधी शहरात उपलब्ध आहेत. राज्यातील वेगवेगळ्या जिल्ह्यांतून; तसेच परराज्यांतून येथे शिक्षण आणि नोकरीसाठी येणाऱ्यांची संख्याही लाखांच्या घरात आहे. त्यामुळे नोकरी मिळविण्यासाठी ‘जॉब पोर्टल’वर अनेक जणांचे’बायोडाटा’ सातत्याने अपलोड होत असतात.
याच ‘बायोडाटा’चा वापर करून चोरट्यांनी गेल्या वर्षात नऊशेहून अधिक जणांना गंडा घातला आहे. पुणे पोलिसांच्या सायबर पोलिस ठाण्यात या तक्रारींचा पाऊस असून तरुणांनी आपली फसवणूक टाळण्यासाठी जागरूक राहावे, असे आवाहन पोलिसांकडून करण्यात आले आहे. पुणे शहरात २०१९मध्ये नोकरीच्या आमिषाने गंडा घातल्याच्या ४३० तक्रारी दाखल झाल्या होत्या. करोनानंतर या तक्रारींमध्ये सातत्याने वाढ होत आहे. २०२०मधील मोठा काळ लॉकडाउनमध्ये गेला, असे असतानाही या तक्रारींमध्ये वाढ झाली. गेल्या वर्षी या तक्रारींमध्ये लक्षणीय वाढ झाली असून ९०० जणांना नोकरीच्या आमिषाने ऑनलाइन गंडा घातल्याचे समोर आले आहे. यामध्ये ८५ कोटी ४३ लाख ३४ हजार ७३४ रुपयांची फसवणूक झाल्याचे समोर आले आहे.
काही घटना
१) धायरी येथील ४२ वर्षीय व्यक्तीला परदेशात नोकरी हवी होती. ते नोकरीसाठी ऑनलाइन शोध घेत होते. आरोपींनी त्यांच्याशी संपर्क साधला आणि त्यांना बेल्जियममध्ये चांगल्या नोकरीचे आमिष दाखविले. त्यानंतर नोकरीची कागदपत्रे पाठविण्यासाठी कागदपत्र, ‘वर्क परमीट’ यासाठी म्हणून एक लाख ९२ हजार रुपये घेऊन फसवणूक केली.
२) माणिकबाग परिसरात राहणाऱ्या ३० वर्षीय उच्चशिक्षित तरुणाला इंग्लंडमध्ये चांगल्या पगाराची नोकरी लावण्याच्या आमिषाने चार लाख ६७ हजार रुपयांना फसविण्यात आले. नोकरीच्या शोधत असलेल्या या तरुणाने त्याची सर्व माहिती ऑनलाइन अपलोड केली होती. सायबर चोरट्यांनी त्याच्याशी संपर्क साधून चांगला पगार देण्याचे आमिष दाखविले. व्हिसा व विविध कारणांसाठी त्याच्याकडून चार लाख ६७ हजार रुपये उकळले.
३) ‘घरात बसून नोकरी करा आणि दरमहा आकर्षक वेतन मिळवा, ‘ असा मेसेज हडपसर येथील २५ वर्षीय तरुणीच्या मोबाइलवर आला. नोकरीसाठी त्या तरुणीस चोरट्यांनी एक ‘लिंक’ पाठविली. ऑनलाइन पद्धतीने काम करण्यासाठी काही प्रक्रिया पार पाडावी लागेल, असे चोरट्यांनी सांगितले. कंपनीची मेंबरशिप मिळवून देण्याचा बहाणा करून तिच्याकडून वेळोवेळी चार लाख ५७ हजार रुपये उकळले.