बीसीसीआयमध्ये गार्ड, ग्राऊंड स्टाफ, मेन्टनन्स व इतर पदांवर नोकरीला लावून देण्याचे आमिष दाखवून मनीष कैलाश पेंटर नामक व्यक्तीने अनेक बेरोजगार तरुण तरुणींकडून साडेपाच लाख रुपयांपेक्षा अधिक रकमेचा अपहार केल्याचे उघडकीस आले आहे. हा आरोपी बीसीसीआयचे डी. के. जैन, सौरभ गांगुली, विनोद रॉय, जय शहा यांच्या नावाने त्याला आलेले मेल तरुण-तरुणींना दाखवून त्यांचा विश्वास संपादन करत असल्याचे आढळून आले आहे. रबाळे पोलिसांनी या भामट्याविरोधात फसवणुकीसह अपहाराचा गुन्हा दाखल करून त्याचा शोध सुरू केला आहे.
मनीष हा ऐरोली सेक्टर-२ मध्ये राहण्यास असून त्याने बीसीसीआय (द बोर्ड ऑफ कन्ट्रोल फॉर क्रिकेट इन इंडिया)मध्ये चांगल्या ओळखी असल्याचे भासविले होते. तसेच, त्या ओळखीतून तो बीसीसीआयमध्ये गार्ड, ग्राऊंड स्टाफ, मेन्टनन्स व इतर विविध पदांवर नोकरी लावून देत असल्याचे ओळखीतील लोकांकडून पसरविले होते. या जाहिरातबाजीला भुलून अनेक बेरोजगार तरुण-तरुणींनी या भामट्याची भेट घेतली होती. त्यापैकीच एक असलेला कळवा येथील श्रीकृष्ण जावळे (२६) यानेही २०१७मध्ये मनीषची ऐरोली येथील त्याच्या घरी भेट घेतली होती. त्यावेळी श्रीकृष्ण याने मनीषने सांगितल्यानुसार बीसीसीआयमध्ये असिस्टंट ग्राऊंड स्टाफच्या नोकरीसाठी ५० हजार रुपये दिले होते. त्यानंतर मनीषने बीसीसीआयच्या लेटरहेडवर श्रीकृष्ण याच्या नावाने असिस्टंट ग्राऊंड स्टाफ सुपरवायझरपदावर नेमणूक केल्याचे पत्र त्याला दिले होते. त्यात वार्षिक ५ लाख २९ हजार रुपयांचे पॅकेज, वर्षाला १५ सुट्ट्या देण्यात येणार असल्याचे तसेच बीसीसीआयचे सीईओ विनोद रॉय यांचे नाव व सही असलेले अपॉइंटमेंट लेटर श्रीकृष्ण याला दिले होते. मात्र ठरल्याप्रमाणे नोकरी न लागल्याने श्रीकृष्ण व नोकरीसाठी त्याच्याकडे पैसे देणाऱ्या तरुण-तरुणींनी त्याच्याकडे चौकशी केली असता, बीसीसीआयची बैठक झाली नसल्याचे व इतर वेगवेगळी कारणे सांगून त्याने वेळ मारून नेली होती. नंतर मात्र या भामट्याने बेरोजगार तरुण-तरुणींचे फोन न उचलणे, भेटण्यास टाळाटाळ करणे असे प्रकार सुरू केले. त्यामुळे काही तरुणांनी रक्कम परत मागण्यास सुरुवात केल्यानंतर त्याने टाळाटाळ केली. फसवणूक होत असल्याचे या तरुणांच्या लक्षात आल्यानंतर त्यांनी रबाळे पोलिस ठाण्यात तक्रार दाखल केली.