कुरिअर आल्याचे सांगत घरात घुसून वृद्धेच्या गळ्याचा चाकू लावत तीन लाख रुपये किंमतीच्या सोन्याच्या अंगठ्या लुटणाऱ्या संशयितास क्राइम ब्रँचने बेड्या ठोकल्यात. संशयित आरोपीने घरातील मोलकरणीच्या मदतीने १४ डिसेंबर रोजी हे कृत्य केले होते. प्रदीप आसुराज भगत (२३, रा. हनवतखेडा, पो. आमखेडा, जिल्हा वाशिम) आणि सोनू विनोद तायडे असे या गुन्ह्यातील संशयित आरोपींची नावे आहे. होलाराम कॉलनीतील संचेती पार्क येथे राहणाऱ्या पद्मा केला (७३) यांच्या फिर्यादीनुसार सरकारवाडा पोलिस ठाण्यात गुन्हा दाखल करण्यात आला आहे. घटनेच्या दिवशी घरातील सीसीटीव्ही कॅमेरे बंद करण्यात आल्याचे समोर आल्याने पोलिसांच्या संशयाची सुई घरकाम करणाऱ्या सोनू तायडे या महिलेवर होती. पोलिसांनी तिला अटकही केली. मात्र, ती माहिती देण्यास तयार होत नव्हती. जामिनावर सुटलेल्या सोनूवर पोलिसांचे लक्ष होते. तिच्या प्रत्येक हालचाली पोलिस टिपत होते. क्राइम ब्रँचच्या युनिट एकच्या पथकाने सोनूचा नातेवाइक प्रदीप भगतचा माग काढला. त्यास अटक करून दोघांची एकाचवेळी वेगवेगळ्या ठिकाणी चौकशी केली. त्यात या दोघांनी चोरीचा कट रचल्याचे समोर आले. पोलिसांनी अंगठ्या जप्त केल्या आहेत.