शिवशंकर कॉलनीत रविवारी (२४ मे) भरदुपारी घरफोडी झाली. एका घराचे कुलूप तोडून चोरांनी मौल्यवान वस्तू पळवल्या. दरम्यान, घरफोडीनंतर जवाहर कॉलनी पोलिसांना घटनास्थळी धाव घेतली. शिवशंकर कॉलनीत वैजापूरचे तालुक्यातील पालखेडचे तलाठी सतीश पाटील हे राहतात. ते रविवारी सकाळी नाशिकला गेले. त्यांच्या घरी कोणी नसल्याची संधी साधून चोरांनी दुपारी कुलूप तोडून प्रवेश केला. चोरांनी घरातील दोन कपाटे फोडून वस्तू चोरल्या. विशेष म्हणजे तलाठी सतीश पाटील याच्या घराशेजारीच त्यांचे बंधु राहतात. ही चोरी होताना त्यांना थोडीही कुणकूण लागली नाही. या घरातून किती रुपयांचा ऐवज चोरीस गेला याची माहिती सतीश पाटील परतल्यानंतरच कळणार आहे, अशी माहिती पोलिसांनी दिली.
रविवारी बहुतेक लोक हे घरीच असतात. या परिस्थितीत शिवशंकर कॉलनी सारख्या गजबजलेल्या भागात चोरी झाल्याने आसपासच्या परिसरात आश्चर्य व्यक्त होत होते. दुपारच्या उन्हामुळे नागरिक घरात होते व रस्त्यावर गर्दी कमी असल्याने चोरीचा सुगावा लागला नसावा. या भागातील एका घरातून चोरांनी शनिवारी चार हजार रुपये पळवले आहेत. या घराचे कुलूप नीट लावलेले नव्हते. मात्र या चोरीची फिर्यात पोलिसांत दिलेली नाही. रविवारच्या चोरीनंतर ही घटना समोर आली आहे.