तौक्ते चक्रीवादळामुळे मिरा-भाईंदर शहरातील अनेक घरांचे नुकसान झाल्याने दुरुस्ती करण्याच्या दृष्टीने साहित्य खरेदी करता यावे, यासाठी महापालिका आयुक्तांनी मंगळवारी रात्री आदेश काढून हार्डवेअर दुकाने सुरू ठेवण्यास परवानगी दिली.
मिरा-भाईंदर शहरात तौक्ते चक्रीवादळामुळे सलग दोन दिवस सुरू असलेल्या पाऊस व वादळी वाऱ्यामुळे अनेक घरांचे नुकसान व सोसायटी मधील वीज यंत्रणा कोलमंडणे आदीमुळे मोठ्या प्रमाणावर नुकसान झाले. आवश्यक ती दुरुस्ती करायची असली तरी हार्डवेअरची दुकाने अत्यावश्यक सेवेत येत नसल्याने बंद होती. त्यामुळे नागरिकांना त्रास सहन करावा लागला. तसेच पावसाळा काही दिवसांवर आल्याने नागरिकांना आवश्यक ती व्यवस्था करण्याची गरज आहे. त्यामुळे काही दिवसांपासून सर्वसामान्य नागरिकांसह लोकप्रतिनिधींकडून हार्डवेअरचे दुकान सुरू ठेवण्याची परवानगी द्यावी, अशी मागणी होऊ लागली. आयुक्त दिलीप ढोले यांनी मंगळवारी रात्री आदेश काढून इलेक्ट्रिकल व हार्डवेअरची ज्या दुकानात ताडपत्री, खेळ प्लास्टिक, बांबू , कुराड, विद्युत उपकरणे आदी दुरुस्तीसाठी लागणारे आवश्यक साहित्य मिळते, त्यांना सोमवार ते शुक्रवार सकाळी ७ ते ११ वाजेपर्यंत सुरू ठेवण्यास परवानगी देण्यात आली. तर शनिवारी व रविवारी दुकाने पूर्णतः बंद ठेवण्याच्या सूचना देण्यात आल्या.