दारुच्या नशेत आईचा खून करणाऱ्या एका १५ वर्षीय युवकाला पोलिसांनी अटक केली आहे. आपल्या आईकडे दारूसाठी पैसे मागूनही तिने ते न दिल्याने रागावलेल्या या मुलाने झोपलेल्या आईला बेदम मारहाण केली. त्यात आईचा मृत्यू ओढवला. या युवकाला आपल्या मित्रांसोबत दारू पिण्याचा नाद लागला होता.
जेव्हा या युवकाने आईला मारहाण करण्यास सुरुवात केली, तेव्हा या युवकाचे वडीलही घरातच होते. मात्र, तेही दारू पिऊन झिंगलेले असल्याने आपल्या बायकोला वाचवण्यासाठी ते काहीही करू शकले नाहीत. मेहरबान पोलीस ठाण्याच्या हद्दीत ही घटना घडली. या अल्पवयीन युवकाची ओळख गुप्त राखता यावी यासाठी मृत आई आणि त्याच्या वडिलांची ओळखही उघड करण्यात आलेली नाही.
या घटनेबाबत पोलीस सहआयुक्त देविंदर चौधरी यांनी माहिती देताना सांगितले की, या युवकाच्या आईचे वय ५० वर्षे होते. शुक्रवारी रात्री युवकाचे वडिल आपल्या शेजाऱ्यासह आपल्याच घरात बसून दारू प्यायले. त्यानंतर, घरातील सर्वांनी झोपी जाण्याची तयारी सुरू केल्यानंतर या युवकाने आईकडे पैसे मागण्यास सुरुवात केली. या युवकाला आपल्या मित्रांसोबत दारू पिण्यासाठी बाहेर जायचे होते. मात्र, आईने युवकाला पैसे देण्यास ठामपणे नकार दिला आणि ती झोपी गेली. याचा युवकाला मोठा राग आला. त्यानंतर एका मिनिटांनी या युवकाने किचनमधील पॅन आपल्या आईच्या डोक्यावर मारले, त्यानंतर त्याने आईला उसाने देखील मारले.
या मारहाणीत युवकाच्या आईचा जागीच मृत्यू झाला. युवकाचे वडील तेथेच होते, मात्र ते अतिशय प्यायल्याने ते काहीच करू शकत नव्हते असे चौधरी म्हणाले. आईला मारहाण केल्यानंतर हा युवक वस्तीतील आपल्या मित्राकडे गेला आणि त्याने दारूपान केले. जेव्हा आपली बायको काहीच हालचाल करीत नाही, ती निपचीत पडली आहे हे लक्षात आल्यानंतर मध्यरात्रीनंतर २ वाजता त्यांनी आरडाओरड करण्यास सुरू केले.
सुरुवातीला, नवऱ्यानेच आपल्या बायकोला मारले असावे असे पोलिसांना वाटत होते. मात्र, आपल्या मुलाने आपल्या पत्नीला मारले अशी माहिती युवकाच्या वडिलांनी शेजारीपाजारी आणि आपल्या फॅक्टरी सुपरवायझरला माहिती दिली. मात्र, युवकाचे वडील पोलिसांना याबाबत कोणतीही माहिती दिली नाही. मात्र, सुपरवायझरने पोलिसांना घडलेला प्रकार सांगितला.