अनैसर्गिक संबंध प्रस्थापित करणाऱ्या पतीस विरोध करणाऱ्या महिलेला तिच्या पतीने दवाखान्यात तलाक दिल्याची घटना सौभाग्यनगर येथे घडली आहे. पतीचे न ऐकल्यास पतीसोबतचे अश्लील व्हिडीओ मोबाइलवर प्रसारित करण्याची धमकी या घटनेतील पीडितेला तिच्या दिराने दिली आहे.
मुळची पुण्यातील असलेल्या पीडितेने याबाबत नाशिकरोड पोलिस ठाण्यात फिर्याद दिली आहे. त्यानुसार तिचा पती साहील दिलावर मुल्ला, सासू जुगनू मुल्ला, दीर मोहसीन मुल्ला आणि जाव राहत मुल्ला यांच्या विरोधात नाशिकारोड पोलिस ठाण्यात गुन्हा दाखल झाला आहे. पीडितेचा साहील मुल्ला याच्यासोबत ऑक्टोबरमध्ये विवाह झाला. विरोध असतांनाही पती तिच्यासोबत अनैसर्गिक संबंध करीत असे. याबाबत घरातील इतर मंडळीकडे तक्रार केली असता पतीच्या इच्छेनुसार न वागल्यास अश्लील व्हिडीओ मोबाइलवर प्रसारित करण्याची धमकी दीर मोहसीन मुल्ला याने तिचे दिली. तर जाव राहत मुल्ला हिने पतीच्या अनैसर्गिक कृत्याची माहिती कोणालाही न सांगण्याची व सांगितल्यास जगणे हराम करण्याची धमकी दिली.
पतीच्या या त्रासामुळे आरोग्य बिघडल्याने पीडितेला तिच्या पतीने माहेरी आणले. इथेही त्याने तिच्याशी अनैसर्गिक संबंध केले. शारिरीक त्रास वाढल्याने पीडितेला दवाखान्यात उपचारासाठी दाखल केले. यावेळी तिचा पती साहिल मुल्लाही दवाखान्यात होता. पीडितेचे सासरे, सासू, दीर आणि जाव दोन दिवसांनंतर तिला भेटण्यासाठी दवाखान्यात आले. तेथे वाद उपस्थित करून सासू जुगनू मुल्ला हिने पीडितेचा सलायन लावलेला हात मुरगाळला. या वादप्रसंगी साहीलने तीन वेळा तलाक बोलून बेकायदेशीर तालक दिल्याचे पीडितेने फिर्यादीत म्हटले आहे.