मुज्जफ्फरनगर येथील एका २३ तरुणीने बलात्कार करण्याच्या प्रयत्नाला प्रतिकार केल्यावरून तिच्या शेजाऱ्याने तिला जिवंत जाळले असल्याची माहिती एका पोलिस अधिकाऱ्याने सोमवारी दिली. या प्रकरणात संबंधित तरुणी ५० टक्के भाजली असून, तिच्यावर मुज्जफ्फरनगर येथील एका हॉस्पिटलमध्ये उपचार सुरू आहेत, असेही त्यांनी सांगितले. या प्रकरणी पीडित तरुणीच्या आईने अहियापूर पोलिस स्टेशनमध्ये तक्रार दाखल केली असून, आरोपीला अटक करण्यात आली असल्याचे अधिकाऱ्यांनी स्पष्ट केले.
पीडित तरुणीची आई एका प्राथमिक आरोग्य केंद्रात काम करीत असून, ही घटना घडली तेव्हा त्या नेहमीप्रमाणे कामावर गेल्या होत्या. पीडितेला जाळण्यात आल्यानंतर शेजारच्या नागरिकांनी ही बातमी तरुणीच्या आईला दिली. त्यानंतर पीडितेची आई धावत आली आणि तिने मुलीला तातडीने हॉस्पिटलमध्ये उपचारासाठी दाखल केले. एका आठवड्यापूर्वी बिहारमध्ये बलात्कार आणि खून केल्यावरून दोन महिलांचे मृतदेह बक्सर आणि समस्तीपूर आढळून आले आहेत; तसेच अहियापूर पोलिस स्टेशन परिसरातील अन्य एका गावात शुक्रवारी आठ वर्षांच्या मुलीवर लैंगिक अत्याचार व खून करून तिचा मृतदेह बॅगेत भरलेला आढळला. त्यानंतर मृतदेह बागेत फेकण्यात आली.