महाराष्ट्रातील सत्तासंघर्ष एखाद्या सस्पेन्स थ्रीलर चित्रपटाला शोभेल असाच होता. पुढे काय होईल यावर तर्क लावले जायचे. ३०-३२ दिवस हेच सुरू होते. मी स्वप्नातही बडबडायचो की मुख्यमंत्री शिवसेनेचाच होणार,’ असं शिवसेनेचे खासदार संजय राऊत यांनी सांगितलं.
संसदेच्या हिवाळी अधिवेशनानिमित्त महाराष्ट्रातील खासदार सध्या दिल्लीत आहेत. या सर्वांसाठी सेनेचे खासदार राहुल शेवाळे यांनी नुकतंच स्नेहभोजन ठेवलं होतं. शिवसेना, काँग्रेस व राष्ट्रवादी या तिन्ही पक्षाचे खासदार यावेळी उपस्थित होते. तिथं राज्यात महिनाभर चाललेल्या सत्तासंघर्षावर चर्चा रंगली. सत्तेच्या या संघर्षात महत्त्वाची भूमिका निभावणारे संजय राऊत यांनी माध्यमांच्या प्रतिनिधींशी दिलखुलास गप्पा मारल्या. महिनाभर चाललेल्या नाट्यावर त्यांनी सविस्तर भाष्य केलं. ते म्हणाले, ‘हा सत्तासंघर्ष खूपच रोमांचकारी होता. आताच्या घडीला काय होईल, दुपारी काय होईल आणि संध्याकाळी काय होईल काहीच सांगता यायचं नाही. पवार टोपी लावतील की काय, अशीही चर्चा लोक करायचे. मी तर झोपेतही मुख्यमंत्री आमचाच असं बडबडायचो. घरातले बोलायचे, बाबा तुम्हाला वेड लागलंय का?, पण आम्ही आमच्या निर्धारावर ठाम होतो आणि तो खरा करून दाखवला.’
ठरवलं तर शरद पवार काहीही करू शकतात!
अजित पवारांच्या पहाटेच्या शपथविधीबद्दल ते म्हणाले, ‘आंघोळ करून बसलोच होतो तेवढ्यात अजित पवारांनी शपथ घेतल्याचं कुणीतरी सांगितलं. सुरुवातीला मला विश्वास बसला नाही. पण शरद पवारांवर आमचा विश्वास होता. शरद पवारांनी एकदा एखादी गोष्ट ठरवली की ती पूर्ण करण्यासाठी ते प्रचंड कष्ट घेतात. फडणवीसांना घरी बसवायचं हा त्यांचा शब्द होता, तो त्यांनी खरा करून दाखवला.’