हळदीच्या कार्यक्रमात नाचू न देता हाकलून दिल्याच्या रागातून झालेल्या वादात येवलेवाडी येथील हनुमान मंदिराजवळील चौकात रविवारी रात्री मारामारी झाल्याची घटना घडली. या वेळी टोळक्यापैकी एका आरोपीने हवेत गोळीबार केल्यामुळे परिसरात खळबळ उडाली. या प्रकरणी कोंढवा पोलिसांनी गुन्हा दाखल करून २१ जणांना अटक केली आहे.
या घटनेत मोहसीन शेख, सनी शिंदे, श्रीदेवी मेश्राम, शाकीर शेख हे जखमी झाले आहेत. यातील सनी व श्रीदेवी यांना उपचार घेऊन सोडण्यात आले आहे. तर मोहसीन आणि शाकीरवर ससून रुग्णालयात उपचार सुरू आहेत. याबाबत सलमा सलीम शेख (वय ३६, रा. येवलेवाडी) यांनी दिलेल्या तक्रारीवरून अजय जमखंडी, स्वप्नील धांडेकर, रवी धांडेकर, विनोद चिमुला यांच्यासह २१ जणांवर खुनाच्या प्रयत्नाचा गुन्हा दाखल करण्यात आला असून, २१ जणांना अटक करण्यात आली आहे.
पोलिसांनी दिलेल्या माहितीनुसार, आरोपी रवी धांडेकर याचा मित्र विशाल याच्या बहिणीचे सात डिसेंबर रोजी लग्न होते. त्या वेळी काहीजण मद्यपान करून आले होते. त्यामुळे तक्रारदार यांचा मुलगा मोहसीन शेख याने रवी धांडेकर याला नाचू दिले नव्हते. त्याचा राग मनात धरून आरोपींनी दुसऱ्या दिवशी मोहसीनला लाकडी दांडके, कोयता, लोखंडी रॉडने मारहाण केली. यात मोहसीन याच्या अंगावर अनेक जखमा झाल्या असून, तक्रारदार व इतर व्यक्ती भांडण सोडविण्यासाठी आल्यानंतर त्यांना देखील मारहाण करण्यात आली. या वेळी आरोपीने चिमुला याने हवेत गोळीबार करून दहशत निर्माण केली आहे. गोळीबारानंतर परिसरात खळबळ उडाली होती. घटनेची माहिती मिळताच वरिष्ठ पोलिस अधिकाऱ्यांनी तत्काळ धाव घेतली. या प्रकरणी कोंढवा पोलिसांनी २१ जणांस अटक केली आहे.