भारतरत्न लता मंगेशकर यांच्या प्रकृतीत सुधारणा झाली असून त्यांना घरी पाठवण्यात आले आहे. कोट्यवधी चाहत्यांच्या प्रार्थना आणि डॉक्टरांच्या अथक मेहनतीने त्यांना २८ दिवसांनंतर रुग्णालयातून घरी पाठवण्यात आले. लतादींदींनी स्वतः ट्वीट करून त्यांची प्रकृती ठिक असल्याचं सांगितलं.
चाहत्यांच्या प्रार्थना दीदींच्या पाठिशी असल्या तरी डॉक्टरांच्या टीमने अथक प्रयत्नांनी लता दीदींवर उपचार केले आणि त्यांना बरं केलं. एका इंग्रजी वेबसाइटने लता मंगेशकरांवर उपचार करणारे डॉक्टर प्रतीत समदाननी यांची मुलाखत घेतली. प्रतीत यांनी सविस्तरमध्ये लतादीदींच्या आरोग्याबद्दल सांगितले.
डॉक्टर म्हणाले की, ‘जेव्हा लता मंगेशकरांना रुग्णालयात आणण्यात आलं होतं, तेव्हा त्यांना बरं करू हा विश्वास घरच्यांना देणं आमच्यासाठी फार कठीण होतं. गेले २८ दिवस फार तणावात होते. पण मला याचा आनंद आहे की माझ्या टीमने त्यांच्यावर उपचार केले आणि त्या बऱ्या झाल्या. त्या आयकॉन आहेत.’
डॉक्टरांनी सांगितल्यानुसार, लतादीदींनी हृदयाशी निगडीत आजार होता. त्यात छातीत संसर्ग झाल्यामुळे त्यांना श्वास घ्यायला त्रास होत होता. त्यामुळे काही दिवस त्यांना वेन्टिलेटरवर ठेवण्यात आलं होतं. जेव्हा स्वरसम्राज्ञी पूर्ण बऱ्या झाल्या तेव्हा डॉक्टर प्रतीत स्वतः त्यांना घरी सोडायला गेले. प्रतीत म्हणाले की, ‘त्यांना घरी जाण्याची परवानगी जेव्हा देण्यात आली तेव्हा मी आणि माझे दोन साथीदार त्यांना सोडायला घरी गेलो होतो.’
रुग्णालयातून घरी आल्यानंतर लता मंगेशकर यांनी ट्वीट करत म्हटलं की, ‘गेल्या २८ दिवसांपासून मी ब्रीच कँडी रुग्णालयात होते. मला न्युमोनिया झाला होता. मी पूर्ण बरी होऊन घरी जावं हीच डॉक्टरांची इच्छा होती. आज मी घरी आले. देव, माई- बाबा यांचे आशीर्वाद, तुम्हा सर्वांच्या प्रार्थना आणि प्रेमामुळे मी आता ठीक आहे. मी तुम्हा सर्वांची आभारी आहे.’