उत्तर प्रदेशातील लखीमपूरमध्ये ‘एका लग्नाची विचित्रच गोष्ट’ घडली आहे. वरमाळा गळ्यात पडल्यानंतर आनंदाच्या भरात नवरदेवानं स्टेजवरच नागीण डान्स केला आणि तोच त्याच्या अंगलट आला. नवऱ्या मुलीला त्याचा नागीण डान्स खटकला आणि तिनं तात्काळ वेगळं होण्याचा निर्णय घेतला. संसाराच्या नव्या ‘इनिंग’ची सुरूवात होण्याआधीच तिनं लग्न मोडलं.
लखीमपूरच्या खिरी जिल्ह्यातील मैलानी परिसरात शुक्रवारी ही घटना घडली. नवऱ्यामुलीनं स्टेजवर नवरदेवाला माळा घातल्यानंतर लगेच घटस्फोट घेतला. नवरदेवानं लग्न लागल्यानंतर दारूच्या नशेत स्टेजवरच नागीण डान्स करण्यास सुरुवात केली आणि हीच बाब नवरीला खटकली. तिनं तिथेच लग्न मोडलं. संसार सुरू होण्याआधीच मोडल्यानंतर रागाच्या भरात नवरदेवानं मुलीच्या कानशिलात भडकावली. त्यानंतर लग्नाच्या मांडवात गोंधळ उडाला. या घटनेची माहिती पोलिसांना मिळाली. त्यांनी तात्काळ तिथे धाव घेतली. लग्नात दिलेल्या भेटवस्तू परत केल्यानंतर दोन्ही कुटुंबीयांनी पोलिसांत परस्परविरोधी तक्रार न करण्याचा निर्णय घेतला.
मिळालेल्या माहितीनुसार, मैलानी परिसरात वरात आल्यानंतर रितेश (नाव बदलण्यात आलं आहे) मंगल कार्यालयात पोहोचला. त्याचवेळी रितेशचे मित्र त्याला मंचावर घेऊन गेले. सर्व जण नाचू लागले. वधूपक्षाच्या मंडळींनी रितेशला तेथून बाजूला करण्याचा प्रयत्न केला. त्यावेळी त्यानं त्यांच्याशी वाद घातला. त्यानंतर हे प्रकरण मिटलं. काही वेळात मुहूर्ताची वेळ झाली. रितेश आणि वधूनं एकमेकांच्या गळ्यात माळा घातल्या. त्यानंतर रितेश पुन्हा मंचावर गेला आणि नाचू लागला. दारूच्या नशेत असलेल्या रितेशनं नागीण डान्स करण्यास सुरुवात केली. नववधूला ते आवडलं नाही. तिनं तात्काळ हे झालेले लग्न मोडण्याचा निर्णय घेतला आणि तेथून निघून गेली. रितेश आणि त्याच्या कुटुंबीयांनी तिला समजावण्याचा प्रयत्न केला. पण काही उपयोग झाला नाही. रितेश आणि त्याच्या मित्रांनी मुलीच्या आई-वडिलांशी वाद घालण्यास सुरुवात केली. तसंच रितेशनं त्या मुलीच्या कानशिलात लगावल्याचंही सांगण्यात येतं.