ऑस्ट्रेलियाच्या पूर्व भागातील वणवा अद्याप शमला नसून, सिडनी धोक्याच्या प्रचंड मोठ्या सावटाखाली आहे, अशी माहिती सरकारी अधिकाऱ्यांनी दिली आहे. शुक्रवारी लागलेल्या वणव्याच्या आगीत आतापर्यंत दीडशे घरे जळून खाक झाली असून, तीन जण मृत्युमुखी पडले आहेत. रविवारी सरकारी अधिकाऱ्यांनी काही भागाची पाहणी केली. त्यानंतर त्यांनी दिलेल्या माहितीनुसार, न्यू साउथ वेल्स आणि क्वीन्सलँड भागातील सुमारे १०० ठिकाणे अद्याप धुमसत आहेत. परिस्थितीवर अद्याप पूर्णत: नियंत्रण मिळविण्यात आलेले नाही.
शुक्रवार आणि शनिवारी अनेक शहरांना आगीचा वेढा होता. सिडनीला पहिल्यांदाच आगीचा एवढा मोठा धोका निर्माण झाला आहे. आजवर कधीही अशी घटना घडली नव्हती, असे अधिकाऱ्यांनी सांगितले. ग्लेन इन्सच्या महापौर कॅरोल स्पार्क्स यांनी सांगितले, की रहिवाशांना आगीचा मोठा फटका बसला असून, त्यांचे प्रचंड मोठ्या प्रमाणावर नुकसान झाले आहे. आगीचे लोळ सहा फूट उंचीचे आहेत आणि आग ताशी ८० किलोमीटर वेगाने पसरत आहे, अशी माहिती स्पार्क्स यांनी दिली आहे. नॉर्थ साउथ वेल्सच्या अग्निशमन सेवेचे प्रवक्ते ग्रेग अॅलन यांच्या माहितीनुसार पाच जण बेपत्ता झाले आहेत. ओल्ड बारमधील जंगल आगीत भस्मसात झाले असून, तेथील काही घरेदेखील जळून खाक झाली आहेत. क्वीन्सलँड येथे अग्निशमन दलाचे सुमारे बाराशे जवान पन्नास ठिकाणी लागलेल्या आगीवर नियंत्रण मिळवण्याचे प्रयत्न करत असून, मदतकार्यदेखील करत आहेत. तेथे आपत्कालीन आणीबाणी घोषित करण्यात आली आहे. नुकसानग्रस्तांना ऑस्ट्रेलिया सरकारने प्रत्येकी एक हजार ऑस्ट्रेलियन डॉलरचे आर्थिक साह्य करण्यास सुरुवात केली आहे.