आगामी विधानसभा निवडणुकीच्या दृष्टीने राज्य उत्पादन शुल्क विभागाने तय़ारी सुरू केली आहे. निवडणुकीमुळे जिल्ह्यातील सर्व दारू विक्रेत्यांना दुकानांमध्ये सीसीटीव्ही कॅमेरे बसविणे बंधनकारक करण्यात आले आहे. सीसीटीव्ही कॅमेरे न बसविणाऱ्या दुकानमालकाला ५० हजार रुपयांचा दंड करण्यात येणार आहे. त्याचबरोबर अचानक दारू विक्री वाढल्यानंतर दारू विक्रेत्यांवर कारवाई होईल,’ असे राज्य उत्पादन शुल्क विभागाकडून स्पष्ट करण्यात आले.
सप्टेंबर-ऑक्टोबर महिन्यात राज्यात विधानसभा निवडणुकीची आचारसंहिता लागू होण्याची शक्यता आहे. निवडणुकीच्या काळात दारूविक्री वाढते. त्या दृष्टीने राज्य उत्पादन शुल्क विभागाचे अधीक्षक पराग नवलकर यांनी जिल्ह्यातील परवानाधारक बिअरबार, देशी-विदेशी दारू विक्रेते, परमीट रुमधारकांची बैठक घेऊन सूचना दिल्या आहेत. सूचना न पाळणाऱ्या दारू विक्रेत्यांचे परवाने रद्द करण्याचा इशारा नवलकर यांनी दिला आहे. निवडणुकीची वेळ असल्याने दुकानांमध्ये, हॉटेलमध्ये सीसीटीव्ही कॅमेरे बसवावेत. निवडणुकीपूर्वी एक महिना अगोदरचे सीसीटीव्ही कॅमेऱ्यांचे फुटेज ठेवणे आवश्यक आहे. निवडणूक आयोगाने सीसीटीव्ही कॅमेऱ्यांचे फुटेज मागितल्यानंतर ते देणे बंधनकारक आहे. ज्या दिवशी ड्राय डे असतो. त्या अगोदर मोठ्या प्रमाणात दारूची विक्री होते. अशा वेळी घाऊक व किरकोळ दारूची विक्री करू नये. जर कोणी अवैधरित्या दारू विक्री करताना पकडला गेला, तर त्याने दारू कोठून खरेदी केली. त्या दुकानाचा शोध घेऊन त्यांच्यावरही कारवाई केली जाईल, अशा सूचना नवलकर यांनी दिल्या आहेत. गेल्यावर्षी महानगरपालिकेच्या निवडणुकीत नियमांचे उल्लंघन करणाऱ्या २३ दारू दुकानांचे परवाने जिल्हाधिकाऱ्यांनी निलंबित केले आहेत. तर काही दुकानांवर दंडात्मक कारवाई करण्यात आली असल्याची माहिती नवलकर यांनी बैठकीत दिली.
तीस टक्कांपेक्षा जास्त दारू विक्री करणाऱ्यांची चौकशी
निवडणुकीच्या काळात तीस टक्कांपेक्षा जास्त दारू विक्री करणाऱ्या दुकानांची चौकशी केली जाणार आहे. त्यासाठी या निवडणुकीच्या दरम्यान सप्टेंबर व ऑॅक्टोबर या महिन्यात होणारी दारू विक्रीची तुलना गेल्या वर्षीच्या सप्टेंबर व ऑक्टोबर महिन्याबरोबर केली जाणार आहेत. या तुलनेत दोन महिन्यांची विक्री तीस टक्कांपेक्षा जास्त आढळल्यास त्या दुकानांवर चौकशी करून परवाने निलंबित करणे, दंडात्मक कारवाई राज्य उत्पादन शुल्क विभागाकडून करण्यात आली आहे.
दारू पार्टीची माहिती द्या
विधानसभा निवडणुकीच्या कालावधीत होणाऱ्या पार्टीची पूर्व सूचना राज्य उत्पादन शुल्क विभागाला देणे बंधनकारक आहे. राजकीय पक्षाने पार्टीचे आयोजित केल्यास त्याची माहिती उत्पादन शुल्क विभागाला देणे आवश्यक आहे. निवडणुकीच्या काळात कुपनवर दारू देणाऱ्यांवर निर्बंध आहेत. जर कोणी कुपनवर दारू देताना आढळल्यास संबंधितावर नियमानुसार कारवाई करण्यात येईल, असे उत्पादन शुल्क विभागाकडून स्पष्ट करण्यात आले.
हॉटेलमध्ये बैठक
राज्य उत्पादन शुल्क विभागाने दारू विक्रेत्यांना सूचना देण्यासाठी तारकपूर बसस्थानकाजवळील व्ही-स्टार हॉटेलमध्ये ही बैठक आयोजित करण्यात आली होती. या बैठकीला उत्पादन शुल्कचे जिल्ह्यातील निरीक्षक, सहायक निरीक्षक, दारू विक्रेते उपस्थित होते. राज्य उत्पादन शुल्क विभागाच्या कार्यालय़ात बैठकीसाठी जागा नसल्य़ाने हॉटेलमध्ये बैठक आयोजित करण्यात आल्याची माहिती राज्य उत्पादन शुल्कच्या अधिकाऱ्याकडून मिळाली.