अभिनेते ऋषी कपूर यांच्या फॅन्ससाठी एक आनंदाची बातमी आहे. सुमारे वर्षभर कर्करोगाशी यशस्वी लढा दिल्यानंतर ऋषी कपूर पत्नी नीतूसह सोमवारी रात्री न्यूयॉर्कहून भारतात परतले. न्यूयॉर्कमध्ये त्यांच्यावर वर्षभर उपचार सुरू होते.न्यूयॉर्कमध्ये असतानाही ऋषी कपूर सोशल मीडियाद्वारे त्यांच्या चाहत्यांच्या संपर्कात होते. उपचारांदरम्यानच्या काळात ऋषी कपूर यांची पत्नी नीत कपूर याही त्यांच्यासोबत न्यूयॉर्कमध्येच होत्या. जे सेलिब्रिटी तेथे जात, ते ऋषी कपूर यांची भेट घेत होते. रणबीर आणि आलियादेखील अधून मधून ऋषी कपूर यांना भेटायला जात. अभिनेते अनुपम खेर यांची तर ऋषी कपूरसोबत न्यूयॉर्कमध्ये अनेकदा भेट झाली आहे. खेर यांनीही ऋषी कपूर यांच्या घरवापसीबद्दल ट्विट करून शुभेच्छा दिल्या.घरी पोहोचताच आज पहाटे ऋषी कपूर यांनीही ट्विट करत ‘११ महिने आणि ११ दिवसांनी घरी आलो’ असं सांगत त्यांच्या उत्तम आरोग्यासाठी प्रार्थना करणाऱ्या सर्वांचे आभार मानले.