गणेश चतुर्थीच्या दिवशी गणेशविक्री केंद्रात गर्दी होणार असल्याने घरातील सोन्याचे दागिने चोरीस जातील या भीतीने ते दुकानामध्ये आणून ठेवल्यानंतर ते चोरीस गेल्याचे समोर आले आहे. या प्रकरणी गणेश विक्रेत्या महिलेने कळवा पोलिस ठाण्यात तक्रार दाखल केली आहे. अनोळखी व्यक्तीने मूर्ती विकत घेण्याच्या बहाण्याने या महिलेला बोलण्यात गुंतवत ही चोरी केल्याची शक्यता व्यक्त केली आहे.
कळव्यातील खारेगांव पारसिक नगर येथील विमल पार्कमध्ये गणेशमूर्तींची विक्री करणारी ४१ वर्षीय महिला राहते. त्यांचे पती पेणमध्ये काम करतात. या महिलेचे माहेरही पेणमध्ये असल्याने त्यांनी तेथून २५० गणेशमूर्ती विक्रीसाठी पारसिकनगर इथे आणल्या होत्या. युतीका कला केंद्र इथे गणेश विक्री केंद्र उभारून त्या मूर्ती विक्री करत होत्या. गणेशचतुर्थीला गणेश खरेदी करण्यासाठी लोकांची गर्दी असल्याने घराकडे लक्ष देता येणार नाही. म्हणून या दांपत्याने घरातील सोन्याचे दागिने व मूर्ती विक्रीचे रोख पैसे केंद्रात आणले होते. सकाळी ७ वाजल्यापासून गणेशविक्रीसाठी गर्दी वाढत होती. त्यामुळे सकाळी गर्दी कमी झाल्यानंतर या महिलेचे पती घरी आंघोळीला गेले. त्याचवेळी एक व्यक्ती या केंद्रात दाखल झाला आणि त्याने चौकशी सुरू केली. अडीचशे रुपयांना एक मूर्ती द्या असे म्हटले. त्यावेळी दुकानाबाहेरील मूर्ती दाखवत असताना त्यांची सोन्याची आणि पैशांची पिशवी लंपास केली.