पूजेच्या साहित्याची निर्मिती करणाऱ्या नवी मुंबईतील एका कंपनीच्या चंदन पावडर डब्यांच्या मिळत्या-जुळत्या डब्या बनवून विक्री करणाऱ्या ठाण्यातील एका दुकानदाराविरुद्ध फसवणूक तसेच कॉपीराइट कायद्याखाली गुन्हा दाखल करण्यात आला आहे. जयेश मनसुख शाह असे या दुकानदाराचे नाव असून त्याचे जाभंळी नाका परिसरात किराणा स्टोअर्स आहे.
नवी मुंबईतील कंपनी सुगंधित चंदन पावडर, केशर चंदन सुगंधित अष्टगंध, अगरबत्ती, धूप आदी वस्तूंची निर्मिती आणि विक्री करत असून कंपनीचा नवी मुंबईतील तुर्भे येथे प्लांट आहे. कंपनीने व्यापार चिन्हही घेतले आहे. मात्र या कंपनीच्या मालाबाबत तक्रारी येऊ लागल्या. मालाचा दर्जा आणि डब्यामधील मालाचे वजनही कमी असल्याच्या तक्रारी डिस्ट्रिब्युशन यांनी कंपनीकडे केल्याने कंपनी मालकाने याबाबत स्वतः शहनिशा करण्याचा निर्णय घेतला. जाभंळी नाका येथील जयेश शाह याच्या सुमारिया किराणा स्टोअर्समध्ये जाऊन कंपनीमालकाने पूजेच्या सामानाची मागणी केली. दुकानदाराने सुगंधित चंदन पावडरचे दोन डबे दिले. या डब्याची पाहणी केल्यानंतर मूळ निर्मिती करणाऱ्या कंपनीच्या चंदन पावडर डब्यांच्या मिळत्या जुळत्या डब्या बनवून ट्रेडमार्कचा वापर करत मालाची विक्री करत असल्याचे समोर आले.