पती कृत्रिम वस्तूंचा वापर करून लग्नाच्या पहिल्या रात्रीपासून अनैसर्गिक शारीरिक संबंध ठेवत असल्याची तक्रार पत्नीने केली आहे. माहेरहून पाच लाख रुपये घेऊन येण्यासाठी पतीसह सासरच्या मंडळींकडून छळ सुरू असल्याचेही पत्नीने भोसरी पोलिस ठाण्यात दिलेल्या तक्रारीत नमूद करण्यात आले आहे.
पीडत २८ वर्षीय महिलेने दिलेल्या तक्रारीनंतर पतीसह सासू, चुलत सासू व चुलत सासऱ्याविरोधात भोसरी पोलिस ठाण्यात गुन्हा दाखल केला आहे. पोलिसांनी दिलेल्या माहितीनुसार, पीडितेसोबत २१ ते ३० मे २०१९ दरम्यान हा प्रकार घडला आहे. पीडित महिलेचा पती आणि सासरचे औरंगाबाद जिल्ह्यातील कन्नड येथील रहिवासी आहेत. मुलगा नपुंसक असल्याचे माहित असतानाही पीडितेच्या सासू, चुलत सासू व सासरे यांनी लग्न लावून दिले. हा मुलगा कृत्रिम वस्तूंचा वापरून पत्नीशी लग्नाच्या पहिल्या रात्रीपासून अनैसर्गिक शारीरिक संबंध ठेवत होता; तसेच शारीरिक, मानसिक व लैंगिक छळ करून मारहाण करीत होता. ‘लग्नात खर्च झालेल्या रकमेच्या बदल्यात माहेरून पाच लाख रुपये घेऊन ये,’ असे त्याने विवाहितेस सांगितले. या प्रकरणात पीडितेने फिर्याद दिल्यानुसार भोसरी पोलिस ठाण्यात गुन्हा दाखल केला असून, औरंगाबाद तालुक्यातील कन्नड पोलिस ठाण्याकडे तपासासाठी हा गुन्हा वर्ग करण्यात आला आहे.