दारुची बाटली आणण्यासाठी गेलेली पत्नी उशिरा घरी आल्याने संतप्त पतीने लाकडी दांडक्याने मारहाण करून पत्नीची हत्या केली असून मुंब्रा पोलिसांनी आरोपीला अटक केली आहे. दोन लहानग्यांच्या डोळ्यांदेखतच हे हत्याकांड घडले.
प्रवीण जयराम पुरबिया (३०) हा पत्नी संतोषी (२५) आणि मुलगा परशुराम, मुलगी सुरेखा यांच्यासोबत मुंब्रा अमृतनगर येथील शिवविलास पॅलेसमध्ये राहतो. पुरबिया दाम्पत्य सफाईचे काम करतात. प्रवीणने गुरुवारी रात्री १० वाजता येथील सिद्धार्थनगरमध्ये राहणारी आई मंदा हिला फोन करून पत्नीने औषध प्राशन केल्याने तिचा मृत्यू झाल्याचे सांगितले. आई आणि मुलगा दोघेही मुंब्रा पोलिस ठाण्यात गेले आणि संतोषीच्या मृत्यूची पोलिसांना माहिती दिली. वरिष्ठ पोलिस निरीक्षक मधुकर कड, पोलिस निरीक्षक रामचंद्र वळतकर, अरुण क्षीरसागर यांना घरातील मोरीच्या दरवाजासमोर संतोषी विवस्त्र अवस्थेत पडल्याचे आदळून आले. तसेच, तिच्या अंगावर जखमाही होत्या.
सुरेखाकडे केलेल्या चौकशीत संतोषीच्या हत्येच्या उलगडा झाला. दुपारी चार वाजता पुरबिया दाम्पत्य कामावरून घरी आल्यानंतर प्रवीण यांनी संतोषीला दारूची बाटली आणण्यास सांगितले. दुकानात दारू आणण्यासाठी गेलेल्या संतोषीला येण्यास उशिरा झाला. याच रागातून प्रवीण तिच्याशी भांडू लागला. तसेच, घरातील लादी पुसण्याच्या कपड्यास असलेल्या लाकडी दांडक्याने पत्नीला मारहाण करू लागला. तिचा आरडा-ओरडा ऐकून शेजारची एक महिला मदतीसाठी धावून आली. मात्र आमच्या मध्ये पडू नका, असे सांगत प्रवीणने तिला निघून जाण्यास सांगितले. त्याने दरवाजाची कडी आतून लावून घेत पत्नीच्या अंगावरील कपडे फाडले. हा संपूर्ण प्रकार दोघा भावंडांसमोर घडल्याची माहिती सुरेखा हिने पोलिसांनी दिली.