राष्ट्रसंत तुकडोजी महाराज नागपूर विद्यापीठाच्या लॉ कॉलेज परिसरातील मुलांच्या वसतिगृहात लाखो रुपयांचे कम्प्युटर वर्षभरापासून धुळीत पडले आहेत. येथे कम्प्युटर लॅब तयार होणार होती. लॅबचाही पत्ता नाही. कम्प्युटरसह खुर्च्या, टेबलही धूळ खात आहेत.
खरेदी घोटाळा, अवैध वृक्षतोड, मूलभूत सुविधांचा अभाव, विद्यार्थ्यांचे अधीक्षकाविरुद्ध आंदोलन अशा विविध कारणांसाठी विद्यापीठाचे हे वसतिगृहात चर्चेत असते. या वसतिगृहात शैक्षणिक वर्ष २०१८-२०१९मध्ये विद्यार्थ्यांसाठी वसतिगृहात कम्युटर लॅब तयार करण्याचा निर्णय घेण्यात आला. यासाठी साहित्य खरेदीसाठी प्रस्ताव सादर करून त्याला मान्यताही देण्यात आली. त्यानुसार खरेदी झाली. अधीक्षकांनी पुरवठादाराकडून कम्प्युटर, खुर्च्या आणि टेबल खरेदी केले. या खरेदीसाठीचा मोबदला कंत्राटदाराला देण्यात आल्याचेही समजते. साऱ्या औपचारिकता पूर्ण करूनही आणि पुरवठा होऊनही लॅब मात्र सुरू झाली नाही. ही लॅब कागदावर सुरू आहे की काय, अशी शंका उपस्थित केली जात आहे.
दुरुस्तीचा खर्च वसूल करणार का?
कम्प्युटरची एका वर्षांची वॉरंटी असते. वापरत असताना खराब झाल्यास पुरवठादाराकडून नि:शुल्क दुरुस्ती केली जाते किंवा नादुरुस्त कम्प्युटर बदलून देण्यात येतो. मागील वर्षभरापासून हे सर्व कप्म्युटर धुळीत पडून आहेत. ते सुस्थितीत आहेत की नाही, हे सांगण्याची स्थिती नाही. येत्या काळात लॅब तयार झाली आणि त्यात हे कम्प्युटर बसविण्यात आले तर ते तेव्हा ‘आऊट ऑफ वॉरंटी’ राहतील. अशावेळी दुरुस्ती वा वॉरंटीकाळातील बदलून घेण्याचे कसे, असाही प्रश्न आहे. या दुरुस्तीसाठीचा जास्तीचा खर्चही मग विद्यापीठाकडून घेतला जाणार का, असा प्रश्न उपस्थित केला जात आहे.