पाकिस्तानच्या राष्ट्रीय दिनावर भारताने बहिष्कार घातलेला असताना दुसरीकडे पंतप्रधान नरेंद्र मोदींनी या दिनानिमित्त पाकिस्तानी जनतेला शुभेच्छा दिल्या आहेत. पंतप्रधान मोदींचा संदेश पाकिस्तानचे पंतप्रधान इम्रान खान यांनी ट्विटरवर पोस्ट केला आहे.
जम्मू-काश्मीरमधील पुलवामा येथे सीआरपीएफ जवानांवर झालेल्या आत्मघाती हल्ल्यानंतर भारत-पाकिस्तानमधील संबंधांमध्ये तणाव आहे. या तणावाच्या पार्श्वभूमीवर, दिल्लीतील पाकिस्तान उच्चायुक्तालयात होणाऱ्या पाकिस्तानच्या राष्ट्रीय दिन कार्यक्रमावर बहिष्कार घालण्याचा निर्णय भारताने घेतला. इस्लामाबादेतील भारतीय उच्चायुक्तालयाचे अधिकारीदेखील पाकिस्तानच्या राष्ट्रीय दिनाचा कार्यक्रमास उपस्थित राहणार नसल्याचा निर्णय झाला. मात्र या कार्यक्रमानंतर काही तासांतच पाकिस्तानचे पंतप्रधान इम्रान खान यांनी पंतप्रधान मोदींचा या दिनानिमित्त पाठवलेला संदेश ट्विट केला.
दिल्ली येथील पाकिस्तानच्या उच्चायुक्त कार्यालयातील कार्यक्रमाला फुटीरतावादी संघटना हुरियत कॉन्फरन्सच्या नेत्यांना बोलावल्याने भारताने या कार्यक्रमावर बहिष्काराचा निर्णय घेतला, असं भारताचे परराष्ट्र मंत्रालयाचे प्रवक्ते रवीश कुमार यांनी सांगितले.
मोदींनी पाकिस्तानच्या राष्ट्रीय दिनानिमित्त पाकिस्तानी नागरिकांना दिलेला शुभेच्छा संदेश इम्रान खान यांनी ट्विट केला आहे. ‘दहशतवादमुक्त उपखंड शांततापूर्ण, प्रगतीशील करण्यासाठी लोकांनी एकत्र काम करण्याची गरज आहे,’ असं आवाहन पंतप्रधान मोदी यांनी या संदेशात केलं आहे.