विमा पॉलिसीचा लाभ मिळवून देण्याचे आमिषाने पुण्यातील निवृत्त इंजिनीअरला दीड कोटींचा गंडा घालणाऱ्या टोळीतील तिघांना सायबर सेलने गाझियाबाद येथून अटक केली. या टोळीतील आणखी साथीदारांचा शोध सुरू असून, त्यांनी आणखी काही जणांस गंडा घातला असल्याची शक्यता आहे.
सुमित वत्स टेकचंद शर्मा (वय ३१), अंकुरसिंग पालेराम खुशवाह (वय ३२), दुर्गेश सुभाषचंद्र शर्मा (वय २६, सर्व रा.गाझियाबाद, उत्तरप्रदेश) अशी अटक करण्यात आलेल्या आरोपींची नावे आहेत. शिवाजीनगर परिसरातील मॉडेल कॉलनी येथे राहणारे विजय केशव कानिटकर यांना मार्च २०१८ मध्ये त्यांच्या लँडलाइनवर आरोपींनी फोन केला. त्यांना आयआरडीए चेन्नई या विमा कंपनीमधून बोलत असल्याचे सांगितले. विमा पॉलिसी विषयी माहिती सांगून त्यांच्या जुन्या विमा पॉलीसी बंद झाल्या असले सांगितले. त्यांच्याशी गप्पा मारून विश्वास संपादन केला. त्यांच्याकडून मोबाइल क्रमांक घेऊन त्यांच्या विमा पॉलिसीचे व्याज, लाभ व बोनसचे तीन कोटीपेक्षा जास्त पैसे मिळणर आहेत, असे सांगितले. त्यासाठी काही नवीन पॉलिसी घ्याव्या लागतील. तसेच, काही रक्कम फंड रिलीज करण्यासाठी, टॅक्स म्हणून भरावी लागले, पैसे भरल्याशिवाय लाभ व बोनसची रक्कम मिळणार नाही, असे सांगितले.
तक्रारदार यांनी बंद झालेल्या इन्शुरन्स पॉलिसीचे व्याज, बोनस व इतर लाभ मिळण्याकरिता आरोपींनी सांगितलेल्या रक्कम वेळोवेळी विविध बँक खात्यात भरली. त्यांनी असे एक कोटी ५१ लाख रुपये वेळेवेळी भरत गेले. मात्र, त्यानंतर कोणत्याही प्रकारचा लाभ, व्याज व बोनस मिळला नाही. त्यामुळे त्यांची फसवणूक झाल्याचे लक्षात आल्यावर त्यांनी सायबर सेल पोलिसांकडे धाव घेतली. त्यानंतर शिवाजीनगर पोलिस ठाण्यात गुन्हा दाखल करून सायबर सेलने तपास सुरू केले. तांत्रीक माहितीच्या आधारे गुन्हयातील आरोपी उत्तरप्रदेश येथे असल्याचे समजल्यानंतर वरिष्ठ निरीक्षक राधिका फडके, राजकुमार वाघचौरे यांच्या पथकाने त्यांना गाझियाबाद येथे जाऊन अटक केली.
खातेधारकांना पाच टक्के कमिशन
या गुन्ह्यातील मुख्य आरोपी दुर्गेश शर्मा आहे. त्याने साथीदारांच्या मदतीने हा गुन्हा केला आहे. या गुन्ह्यात अटक केलेले आरोपी सुमित शर्मा व अंकुरसिंह हे त्याच्या ओळखीतील आहेत. त्यांनी पाच टक्के कमिशन घेऊन त्यांची बँक खाती आरोपीला दिली होती. तक्रारदार यांनी त्यांच्या खात्यावर पैसे जमा केल्यानंतर आरोपींनी काढून ते पैसे दुर्गेशला दिल्याचे समोर आले आहे. त्या पैशातील एका आरोपीने स्वतःवर ऑपरेशन करून घेतल्याची माहीत समोर आली आहे. या सर्व फसवणुकीची दोन्ही आरोपींनी संपूर्ण माहिती होती, असे सायबर सेलच्या पोलिसांनी सांगितले.