शिक्षक बदल्यांच्या प्रकरणातील गैरव्यवहारांची चौकशी करून प्रशासनाला बोगस प्रमाणपत्र सादर करणाऱ्या शिक्षकांवर कारवाईच्या मागणीसाठी जिल्हा विस्थापित शिक्षक कृती समितीने सुरू केलेल्या बेमुदत उपोषणादरम्यान गर्भवती असलेल्या शिक्षिकेचा बुधवारी रक्तस्त्राव झाला. प्रकृती बिघडल्याने रुग्णालयात दाखल करावे लागले. जिवाला धोका असल्याने त्यांना गर्भपात करण्याचा सल्ला डॉक्टरांनी दिला आहे. दरम्यान, प्रकृती खालावल्याने अन्य तीन शिक्षकांचीही रुग्णालयात दाखल करण्यात आले
नाशिकरोडच्या विभागीय आयुक्त कार्यालयासमोर विस्थापित शिक्षकांनी ३० जुलैपासून बेमुदत उपोषण सुरू आहे. आंदोलनाच्या तिसऱ्या दिवशी बुधवारी तीन महिलांसह चार शिक्षकांची प्रकृती बिघडली. त्यांना
महापालिकेच्या बिटको रुग्णालयात दाखल करावे लागले. मात्र, प्रशासन उपोषणाची दखल घेऊन बोगस माहिती भरणाऱ्या शिक्षकांवर कारवाई करत नाही तोपर्यंत उपोषण मागे घेणार नाही, असा पवित्रा कृती समितीकडून घेण्यात आला.
आक्काताई कोडक (येवला), रेखा कोंडाजी देवरे, योगिता देवरे (नांदगाव) आणि विजय हरी भामरे (सुरगाणा) या चार शिक्षकांचा समावेश आहे. यापैकी रेखा देवरे आणि आक्काताई कोडक यांची प्रकृती बुधवारी जास्त बिघडली. यापैकी गरोदर असलेल्या आकाताई कोडक यांना रक्तस्त्राव झाला. त्यांना बिटकोत दाखल केल्यावर वैद्यकीय चाचण्यांती त्यांना गर्भपात करावा लागणार असल्याचे निदान उपस्थित डॉक्टरांनी केल्याची माहिती जिल्हा विस्थापित शिक्षक कृती समितीचे जिल्हाध्यक्ष सुभाष अहिरे यांनी दिली. प्रशासनाच्या वतीने बुधवारी उपोषणकर्त्या शिक्षकांशी चर्चा करण्यासाठी कोणी आले नसल्याचेही आहिरे यांनी सांगितले.
जिल्हा परिषद शाळांमधील शिक्षकांच्या बदल्या मानवी हस्तक्षेपाशिवाय व्हाव्यात यासाठी ऑनलाइन मार्गाने बदली प्रक्रियेत राबविण्यात आली. परंतु, याचा गैरफायदा घेत जिल्ह्यातील काही शिक्षकांनी बोगस माहिती भरून इच्छितस्थळी बदली करून घेण्यावर भर दिला. यामुळे प्रामाणिकपणे काम करणाऱ्या शिक्षकांवर अन्याय झाला. हा अन्याय दूर करण्यासाठी बोगस माहिती भरलेल्या शिक्षकांवर कारवाई व्हावी, या मागणीसाठी जिल्हा विस्थापित शिक्षकांकडून उपोषण करण्यात येत आहे. उपोषणास २८ महिला व पुरुष शिक्षक बसले असून दोन शिक्षिकांना हॉस्पिटलमध्ये भरती करण्यात आले. तर दोन शिक्षकांवर वैद्यकीय उपचार करण्यात आल्याचे समितीचे अध्यक्ष सुभाष अहिरे यांनी सांगितले.
दीडशे किलोमीटरवर बदली
आक्काताई कोडक या गर्भवती महिला शिक्षिकेला सुमारे दीडशे किलोमीटरवर बदली देण्यात आली आहे. यापूर्वी, त्या इगतपुरी येथील झुगरेवाडी येथे कार्यरत होत्या. प्रवासाची दगदग व मानसिक त्रास यामुळे बदली झाल्याने त्यांच्या प्रकृतीवर परिणाम झाला आहे. शिवाय, तीन दिवस उपोषण केल्यामुळे त्यांना मोठ्या प्रमाणात रक्तस्त्रावही झाला.
चुकीची माहिती भरून सोयीच्या बदल्या मिळणाऱ्या शिक्षकांच्या जागी अन्यायग्रस्त उपोषणकर्त्या शिक्षकांना त्यांच्या जागी पुनर्पदस्थापना देण्यात यावी. प्रशासन दखल घेत नाही तोपर्यंत बेमुदत उपोषण मागे घेणार नाही.