वंटास’ या मराठी चित्रपटातून निर्मिती क्षेत्रात पदार्पण करणाऱ्या अमोल लवटे याला मुंबई गुन्हे शाखेने बुधवारी अटक केली. एका व्यापाराचे सुमारे नऊ किलो सोने घेऊन अमोल पसार झाला होता. दहा दिवसांच्या शोधमोहीमेनंतर तो आणि त्यांचे साथीदार पोलिसांच्या हाती लागले.
काळबादेवी परिसरात अमोल लवटे हा भागीदारीमध्ये सोने गाळण्याचा व्यवसाय करतो. झवेरी बाजारातील एका व्यापाऱ्याने २१ जुलै रोजी त्याला नऊ किलो सोने गाळण्यासाठी दिले. व्यापाऱ्याने त्याच्या नोकराला सोने घेऊन पाठवले होते. दरम्यान, नोकराला झोप लागली. याच संधीचा फायदा घेत अमोल त्याचा भाऊ संदीप लवटे, आप्पा घेरडे, पोपट आटपाडकर हे चौघे सोने घेऊन पसार झाले. त्यांनी जाताना गाळ्याची काडी बाहेरून लावून घेतली. जाग आल्यावर नोकराचा आवाज ऐकून आजूबाजूच्या लोकांनी दरवाजा उघडला. व्यापाऱ्याच्या तक्रारीवरून लोकमान्य टिळक मार्ग पोलिसांनी गुन्हा दाखल केला. अमोल आणि त्याचे साथीदार मानखुर्द टी जंक्शनजवळ येत असल्याचे समजताच पोलिसांनी सापळा रचून त्यांना अटक केली.