मराठा समाजाला आरक्षण देण्यासाठी गेल्या काही दिवसांपासून मराठा आंदोलकांनी पुण्यात सुरू केलेलं आंदोलन आजही सुरूच आहे. या आंदोलकांनी आज थेट पुण्याचे पालकमंत्री गिरीश बापट यांच्या कार्यालयावर धडक देऊन त्यांच्या कार्यालयासमोर ठिय्या आंदोलन केलं. यावेळी राज्यसरकारच्या नाकर्तेपणाचा निषेधही या आंदोलकांनी नोंदवला. बापट यांच्या कार्यालयासमोर अचानक शेकडो मराठा आंदोलक जमल्याने या ठिकाणी पोलिसांचा मोठा बंदोबस्त ठेवण्यात आला होता.
आज सकाळी मराठा क्रांती मोर्चाच्या आंदोलकांनी पालकमंत्री गिरीश बापट यांच्या कार्यालयाकडे कूच केली. आंदोलकांनी बापट यांच्या घरासमोर ठिय्या आंदोलन करत जोरजोरात घोषणाबाजी केली. ‘मराठा समाजाला आरक्षण मिळालेच पाहिजे’, ‘आमदार, खासदारानो जागे व्हा, खोटे गुन्हे मागे घ्या’, अशी सरकारविरोधात घोषणाबाजीही यावेळी करण्यात आली. बापट यांनीही या आंदोलकांची भेट घेऊन त्यांच्याशी चर्चा केली आणि त्यांचे निवेदन स्वीकारले. ‘मराठा समाजाला आरक्षण देण्याबाबत राज्य सरकार सकारात्मक आहे. त्यासाठी मागासवर्गीय आयोगाचा अहवाल आल्यावर विशेष अधिवेशन बोलावून, कायद्याच्या सर्व बाबींची पूर्तता केल्यावर केंद्राकडे अहवाल पाठवला जाईल’, अशी ग्वाही बापट यांनी दिली. ‘मराठा समाजाने शांततामय मार्गाने आंदोलन करावे, हिंसक मार्गाने आंदोलन करू नये’, असे आवाहनही त्यांनी केले. तसेच मराठा समाजासह धनगर आणि मुस्लिम समाजालाही सरकार न्याय देईल, असेही त्यांनी स्पष्ट केले. त्यानंतर मराठा आंदोलकांनी राष्ट्रवादी काँग्रेसच्या खासदार अॅड. वंदना चव्हाण यांच्या घराकडे मोर्चा वळवून तिथेही आंदोलन केले.