औषधांचा ओव्हरडोस घेतल्याने प्रकृती बिघडलेल्या शीना बोरा हत्येतील प्रमुख आरोपी इंद्राणी मुखर्जीने भायखळा तुरुंगात जीवाला धोका असल्याचा दावा केल्यानंतर पोलिसांनी त्याची चौकशी सुरू केली आहे. जे. जे. रुग्णालयातील उपचारांनतर भायखळा तुरुंगात परतलेल्या इंद्राणीने बुधवारी केलेल्या नवीन दाव्यामुळे पोलिसांनी चौकशी सुरू केली आहे.
भायखळा तुरुंगात परतल्यावर इंद्राणीने तुरुंग प्रशासनास अर्ज करून त्यात जीवाला धोका असल्याचे म्हटले आहे. याबाबत इंद्राणीचा जबाब नोंदवण्यात आलेला नसल्याचेही सांगण्यात येते. तिचा जबाब नोंदवण्यासाठी तुरुंग प्रशासनाकडून परवानगी घेतली जाणार असल्याचे स्पष्ट करण्यात आले आहे. त्याचवेळी भायखळा तुरुंग प्रशासनाने विशेष सीबीआय न्यायालयात औषधांचा ओव्हरडोस झाल्याने इंद्राणीची प्रकृती बिघडल्याचा अहवाल गुरुवारी सादर केला.