तालुक्यातील देशमुखवाडी येथील जिल्हा परिषद शाळेत कार्यरत असलेल्या शिक्षकाने ऑनलाइन कामाच्या तणावाला कंटाळून गळफास घेतला आहे, असे पोलिस तपासात समोर आले आहे. सोमवारी (दि. ३०) सकाळी ६ वाजता ही घटना उघडकीस आली असून, आबासाहेब चिंधा चौधरी (वय ४४) असे मृत शिक्षकाचे नाव आहे. पिंपळवाड म्हाळसा जवळील पिलखोड रस्त्यावरील शेतात त्यांनी गळफास घेतला.
शहरातील मालेगाव रस्त्यावरील हॉटेल आशिषच्या पाठीमागे राहण्यास असलेले मृत आबासाहेब चौधरी यांची व त्यांची इतर भाऊबंदांची पिंपळवाड म्हाळसा गावाजवळ पिलखोड रस्त्याला शेती आहे. ते रविवारी (दि. २९) सायंकाळी साडेसात वाजता शेतात पिकांना पाणी द्यायला चाललो, असे घरच्यांना सांगून घराबाहेर पडले होते. रात्री ९ वाजता ते पिंपळवाड येथे काहींना दिसून आल्याचेही समजते. तर सोमवारी सकाळी ६ वाजता त्यांचे काका गंगाराम हरचंद चौधरी यांच्या शेतात त्याचा मृतदेह झाडाला गळफास घेतलेल्या अवस्थेत दूध काढण्यासाठी जाणाऱ्या शेतकऱ्यांना आढळून आला.
आबासाहेब चौधरी यांच्याजवळ पोलिसांना एक वही आढळून आली आहे. त्यात त्यांनी सरकारच्या ऑनलाईन कामाचा फार बोजा आहे. त्याचा खूप ताण आहे. त्यामुळे मी हे पाऊल उचलत असून, माझ्या या आत्महत्येला कोणालाही जबाबदार धरू नये, असेही त्या वहीत म्हटले असल्याची माहिती पोलिसांकडून मिळाली. आबासाहेब चौधरी हे अत्यंत मनमिळावू व विद्यार्थीप्रिय शिक्षक होते. घटनेमुळे शिक्षकवर्गात खळबळ पसरली आहे. त्यांच्या पश्चात पत्नी, दोन मुली असा परिवार आहे. घरातील कर्ता पुरूष गमविल्याने घरच्यांना मोठा धक्का बसला असून, हळहळ व्यक्त होत आहे. याबाबत मेहुणबारे पोलिस स्टेशनाला आकस्मिक मृत्युची नोंद करण्यात आली असून, पुढील तपास नरेन्द्र सरदार करीत आहेत.