गुन्हेगार एखादी तर चूक करतोच, याचा अनुभव पुन्हा एकदा गोवंडी येथे रेल्वे रुळांवर संशयास्पद स्थितीत सापडलेल्या मृतदेहाच्या प्रकरणात आला. वरवर अपघात वाटणाऱ्या या प्रकरणात एका तरुणाची अल्पवयीन मुलानेच हत्या केल्याचे समोर आले. इम्रान कुरेशी (१९) याची हत्या ३०० रुपयांची उधारी परत मागण्यासाठी केलेल्या तगाद्यातून झाल्याचे निष्पन्न झाले आहे.
गोवंडी येथे राहणारा इम्रान कुरेशी हा देवनार कत्तलखान्यात काम करत होता. त्याच्यासोबत १७ वर्षांचा अल्पवयीन आरोपीही असायचा. त्याने इम्रानकडून कत्तलखान्यातील काही मांस उधारीवर घेत त्याची रक्कम नंतर देण्याचे कबूल केले होते. पण, ही ३०० रुपयांची रक्कम परत न मिळाल्याने दोघांमध्ये वाद झाला होता. ९ ऑक्टोबर रोजी त्याने फोन करून इम्रानला बोलावून घेतले. तिथे रात्री ८.३० ते ९च्या सुमारास वादावादी, हाणामारी झाल्यावर आरोपीने इम्रानला चाकूने भोसकले.
या हत्येनंतर त्यास अपघात दाखविण्यासाठी त्याने इम्रानचा मृतदेह रुळांवर ठेवला. सुरुवातीला अपघाती मृत्यू अशी नोंद केल्यानंतर रेल्वे पोलिस क्राइम ब्रँचला संशय आला. त्यानुसार वरिष्ठ पोलिस निरीक्षक संतोष धनवटे, एपीआय महादेव ढाकणे, राहुल कारभारी, सतीश क्षीरसागर, प्रवीण घार्गे, शिंदे आदींनी तपास सुरू केला. तेव्हा मृतदेहाच्या गळ्यावर वार दिसल्याने त्यापद्धतीने शोध घेण्यात आल्यानंतर आरोपीस अटक करण्यात आल्याचे उपायुक्त समाधान पवार यांनी सांगितले.