कृष्णा नदीत आढळल्या 19 मगरी आणि 34 पिले

या नदीतील मगरींमुळे नागरिकांच्या धोका निर्माण झाला आहे. अलिकडेच भिलवडी येथे एका शाळकरी मुलाला मगरीने ओढून नेले होते. त्यानंतर आठवड्याभरात एक नागरिकावर हल्ला करून मगरीने त्याचे पाय तोडले होते. सांगलीत मगरीने माई घाटापासून विष्णुघाटापर्यंत पाऊलखुणा सोडल्या आहेत. सांगलीकरांचा मुक्त वावर असलेल्या ठिकाणी मगर पाण्यावर तरंगू लागल्यानंतर एकच हलकल्लोळ माजला. हरिपूरपासून आमणापूरपर्यंत मगर दिसल्याच्या बातम्या येऊ लागल्या. मगरीच्या संख्येबाबत नागरिकांमध्ये तर्कवितर्क लावण्यात येऊ लागले. दरम्यान वस्तुस्थिती काय, या मगरींचा अधिवास कुठे आहे, तो सुरक्षित ठेवून लोकांचे जगणे सुरक्षित कसे करता येईल, याबाबत वन विभागाने नऊ जूनला सर्वेक्षण केले. या सर्व्हेक्षणात वनविभागाच्या 30 कर्मचाऱ्यांसह निसर्गप्रेमी संस्थांचे 10 प्रतिनिधीही सहभागी होते. हरिपूर ते सांगली, कसबे डिग्रज-मौजे डिग्रज, ब्रह्मनाळ, चोपडेवाडी- सुखवाडी, भिलवडी, औदुंबर आणि आमणापूर अशा ठिकाणी बोटीतून नदीपात्र आणि काठावर सर्वेक्षण करण्यात आले. सकाळी 7 ते 11 आणि दुपारी 3 ते 5 या वेळेत हे काम करण्यात आले. त्यातून मिळालेल्या माहितीनुसार कृष्णाकाठी मगरींची संख्या झपाट्याने वाढत असल्याचे चित्र समोर आले आहे.

का वाढत आहेत मगरी?
जानेवारी ते मे हा मगरींचा प्रजनन काळ असतो. एक मगर साधारणपणे 40 अंडी घालते. मे महिन्यात पिले जन्माला येतात. या काळात अंड्यांची व पिलांची सुरक्षा करण्यासाठी ती आक्रमक असते. तिच्या अधिवास क्षेत्रात माणूस आणि जनावरांचा वावर आल्यास ती त्यांच्यावर थेट हल्ला चढवते. तिच्या अधिवासाच्या परिसरात या काळापुरती सुरक्षेच्या उपाययोजनेबाबत अभ्यास करण्यात येत आहे. मगरींचा अधिवास सुरक्षित ठेवून कृष्णाकाठावरील भीतीची छाया कमी करण्याचा प्रयत्न करणार आहोत, असे विभागीय वनअधिकारी समाधान चव्हाण यांनी “सकाळ‘शी बोलताना सांगितले.

इथे आहेत मगरी…

• हरिपूर ते सांगली – 3 मोठ्या
• मौजे डिग्रज, कसबे डिग्रज – 2 मोठ्या, 5 पिले
• ब्रह्मनाळ – 2 मोठ्या, 10 पिले
• चोपडेवाडी, सुखवाडी – 4 मोठ्या
• भिलवडी – 6 मोठ्या
• औदुंबर – 1 मोठी, 14 पिले
• आमणापूर – 1 मोठी, 5 पिले