साहित्य: पाव किलो कच्ची करवंद, २ मध्यम आकाराच्या कै‍ऱ्या, ३ चमचे जिरे, ४ चमचे धणे, ८-१० लवंगा, १०-१२ काळी मिरी, २ चमचे मेथी दाणे, १ चमचा सुंठ पावडर, ५-६ चमचे मोहरी डाळ, दीड वाटी गूळ, २ चमचे हळद, २-३ चमचे तिखट, हिंग, ३ चमचे किंवा चवीपुरता मीठ, २ पळी किंवा आवश्यकतेनुसार तेल.
कृती: करवंद पाण्याने धुवुन कोरडी करावीत. कै‍ऱ्याही नीट धुवुन त्यांच्या मध्यम आकाराच्या फोडी कराव्यात. त्याला हळद मीठ लावून ठेवावे. नंतर जिरे, धणे, लवंग, काळी मिरी, मेथी दाणे कढईत थोडे गरम करून मिक्सरमध्ये बारीक करून घ्यावे. आता कढईत थोडं तेल घेऊन हा बारीक केलेला मसाला, सुंठ पावडर, मोहरी डाळ, हिंग, हळद, तिखट थोडी अख्खी काळी मिरी, लवंग असं सगळं कढईत चांगले परतून घ्यावं. थोडं गार झाल्यावर गूळ आणि मीठ घालून एकत्र करावं. आता या मसाल्यात करवंद आणि कैरीच्या फोडी घालाव्यात. एका पातेल्यात तेल गरम करावं. तेल गार झाल्यावर लोणच्यात घालून बरणीत भरून ठेवावं. तेल करवंद आणि कैरीच्या फोडींच्या वर राहील असं घालावं. २-३ दिवसात हे लोणचं मुरतं. कैरी नको असल्यास फक्त करवंदाचं लोणच घालू शकतात.