एखाद्या चित्रपटात शोभावा असा हा प्रकार आग्रा येथे रविवारी संध्याकाळी घडला. समाजवादी पक्षाचे नेते अभिनव शर्मा त्यांच्या मर्सिडीज गाडीनं चालले होते. सिग्नलवर त्यांची गाडी थांबली असतानाच एक स्कूटर त्यांच्या गाडीशेजारी उभी राहिली. स्कूटरवर एक तरुणी होती. तिला पाहून शर्मा यांच्या बंदुकधारी सुरक्षारक्षकानं डोळा मारला. त्यामुळं संतापलेली तरुणी स्कूटरवरून खाली उतरली आणि थेट शर्मा यांच्या गाडीवर चढली. गाडीवर चढून तिनं गाडीवर असलेला समाजवादी पक्षाचा झेंडा काढला आणि झेंड्याच्या दांड्यानं गाडीच्या काचा फोडल्या. इतकं करूनही तरुणीचा राग शांत झाला नाही. तिनं शर्मा व त्याच्या बॉडीगार्डला गाडीच्या बाहेर येऊन लढण्याचं आव्हान दिलं.
घटनास्थळी पोहोचलेल्या पोलिसांनी तरुणीला शर्मा यांच्या गाडीवरून उतरण्याची विनंती केली. मात्र, बॉडीगार्डनं माफी मागितल्याशिवाय व मोबाइलची नुकसानभरपाई दिल्याशिवाय खाली उतरणार नाही, असा पवित्रा तिनं घेतला. अखेर तासाभराच्या गोंधळानंतर सपा नेत्यानं मोबाइलच्या नुकसानीची भरपाई म्हणून तरुणीला साडेसहा हजार रुपये दिले आणि सुटका करून घेतली.
मिळालेल्या माहितीनुसार, ही तरुणी आग्रा येथील एका सरकारी बँकेत काम करते. त्या दिवशी संध्याकाळी ती आपल्या लहान बहिणीला डॉक्टरांकडे नेत होती. तेव्हाच हा प्रकार घडला. अन्य एका प्रत्यक्षदर्शीच्या सांगण्यानुसार, संबंधित तरुणीनंच तिच्या मोबाइलवरून शर्मा यांच्या बॉडीगार्डचा फोटो काढला होता. त्यामुळं दुसऱ्या एका बॉडीगार्डनं तिचा मोबाइल हिसकावून फेकून दिला. याचं निमित्त करून तिनं गोंधळ घातला. मात्र, सपा नेत्यानं बॉडीगार्डच्या गैरवर्तनाची कबुली देत प्रकरणावर पडदा टाकला.