शहरातील पाऊस आणि गोदावरीचा पूर ओसरल्यानंतर सिंहस्थ कुंभमेळ्यानिमित्त शहरात सुरू असलेल्या पाच हजार कोटींच्या सिंहस्थ कामांची पोलखोल समोर आली आहे. पाणी ओसरल्यानंतर सिंहस्थाच्या कामांची पुरती वाट लागल्याचे उघड झाले असून, नदीकाठावरील कामे अस्ताव्यस्त झाली आहेत. या अर्धवट कामांच्या फरशाही वाहून गेल्याने नव्याने कामे सुरू करण्याची वेळ ठेकेदारांवर आली आहे.
नाशिकमध्ये सन २०२७ मध्ये सिंहस्थ कुंभमेळा होत असून, त्यानिमित्त जवळपास साडेपाच हजार कोटींची कामे शहरात सुरू आहेत. सिंहस्थातील पहिली पर्वणी ३१ ऑगस्ट रोजी होणार आहे. त्या पार्श्वभूमीवर ही कामे पूर्ण करण्यासाठी मार्च २०२७ ची डेडलाइन देण्यात आली आहे.
सिंहस्थाच्या पार्श्वभूमीवर महापालिकेमार्फत १,२२८ कोटी खर्चुन शहरातील २८ रस्त्यांची कामे सुरू करण्यात आली आहेत. पाणीपुरवठा व मलनिस्सारण विभागामार्फत नदीकाठासह शहरात ५९० कोटींचे कामे हाती घेण्यात आली आहेत. २३० कोटी रुपये खर्चुन नदीकाठावर नव्याने घाट निर्माण केले जात आहेत. शहरातील २८ रस्ते पुन्हा खोदले जाऊ नयेत यासाठी गॅस वाहिनी, भुयारी गटार, जलवाहिनी, ड्रेनेज लाइन, ऑप्टिकल फायबर आदींसाठी उपयोगिता नाले (यूटिलिटी डक्ट) तयार केले जात आहेत. परंतु, संबंधित कामे अतिशय संथ गतीने सुरू आहेत. या कामांनाही पावसाचा मोठा फटका बसला आहे.
सुरक्षात्मक साहित्य गायब सलग आठवडाभरापासून सुरू असलेल्या पुरामुळे नदीपात्रातील ठेकेदारांचे बहुतांश साहित्यदेखील वाहून गेले आहे. पावसामुळे अर्धवट केलेल्या कामांचीही पोलखोल झाली असून, तुटलेल्या अवस्थेतील कामांमुळे गोदावरीचे रूप ओंगळवाणे झाले आहे. त्यातच येथे खोदून ठेवलेले खड्डे, चाऱ्यांमुळे भाविकांचाही जीव धोक्यात आला आहे. त्यामुळे येथून वाट काढताना भाविकांना जीव मुठीत धरून चालावे लागत आहे.
राज्यपाल आज शहरात
नाशिकसह त्र्यंबकेश्वरमध्ये सिंहस्थानिमित्त जवळपास तीस हजार कोटींची कामे सुरू आहेत. सिंहस्थ कुंभमेळ्याची कामे वेळेत पूर्ण ऐन करण्यासाठी एकीकडे प्रशासकीय पातळीवरून धावपळ सुरू असतानाच आज, मंगळवारी (दि. २८) राज्यपाल जिष्णू देव वर्मा सिंहस्थाच्या कामांचा आढावा घेणार आहेत. पावसाळ्यात सिंहस्थाच्या कामांची वाट लागली असताना आणि नाशिककर या कामांमुळे त्रासले असताना प्रशासनाकडून मात्र राज्यपालांसमोर सुंदर चित्रण सादर करण्याची तयारी दौऱ्याच्या पूर्वसंध्येला सुरू होती.