पुणे जिल्हा परिषदेच्या सभागृहात सर्वसाधारण सभा सुरू असताना एका महिलेने चक्क पेट्रोल ओतून आत्मदहनाचा प्रयत्न केल्याचा प्रकार २७ जुलै रोजी सोमवारी दुपारी घडला. यामुळे सभागृहातील सदस्यांसह पदाधिकाऱ्यांमध्ये खळबळ उडाली.
महिलेच्या हातातील पेट्रोलची बाटली हिसकावली
सभागृहाबाहेरील सुरक्षारक्षक आणि सेवकवर्गाने तातडीने धाव घेऊन महिलेच्या हातातील पेट्रोलची बाटली ताब्यात घेतली. या महिलेने जिल्हा परिषद सदस्य मंगेश जगताप यांच्यावर गंभीर आरोप केल्याचे सांगण्यात येते. या घटनेनंतर अध्यक्ष वीरधवल जगदाळे यांनी प्रशासनाला खडेबोल सुनावले; तसेच सुरक्षा व्यवस्था कडक करण्याबाबत आदेश देताना सभागृहात सदस्यांशिवाय कोणालाही प्रवेश देऊ नका, अशा सूचनाही दिल्या.
श्रावणी कुदळे हिचा सत्कार
जिल्हा परिषदेच्या सर्वसाधारण सभा दोन ते तीन महिन्यानंतर असतात. जिल्हा परिषदेच्या २०२६-२७ पुरवणी मागण्यांबाबत चर्चा करण्यासाठी सभा बोलविण्यात आली होती. ‘नीट’ परीक्षेत देशात पहिली आलेली दौंड तालुक्यातील जिल्हा परिषदेच्या शाळेतील विद्यार्थिनी श्रावणी कुदळे हिचा सत्कार करण्यात आला. सर्वसाधारण सभा सुरू असताना अचानकपणे एक महिला सभागृहात आली. तिने आरडाओरडा करण्यास सुरूवात केली. अचानकपणे झालेल्या या प्रकारामुळे सर्व जण अवाक झाले. तातडीने या महिलेस ताब्यात घेऊन तिची रवानगी हिरकणी कक्षात करण्यात आली.
सदस्याने फसवणूक केल्याचा आरोप
जिल्हा परिषदेच्या महिला व बालकल्याण सभापती अंकिता पाटील, आरोग्य व बांधकाम विभागाच्या सभापती दीपाली हुलावळे यांच्यासह काही सदस्यांनी या महिलेला शांत करण्याचा प्रयत्न केल्याचे सांगण्यात आले. या महिलेने माध्यमांसमोर एका जिल्हा परिषद सदस्याने फसवणूक केल्याचा गंभीर आरोप केल्याचे सांगण्यात आले.
कायदेशीर प्रक्रिया सुरू
‘जिल्हा परिषदेतील बैठकीदरम्यान एका महिलेने स्वतःसोबत आणलेले पेट्रोल अंगावर ओतून घेतल्याची घटना घडली. मात्र, तेथे उपस्थित सुरक्षारक्षक आणि पोलिसांनी तातडीने हस्तक्षेप करून तिला ताब्यात घेतले. महिलेची प्रकृती बिघडल्याने तिला प्राथमिक उपचार करून पुढील उपचारासाठी रुग्णालयात पाठविण्यात आले आहे. आवश्यक ती कायदेशीर प्रक्रिया सुरू आहे’, असं बंडगार्डन पोलिस ठाण्याचे वरिष्ठ निरीक्षक संतोष पांढरे यांनी म्हटलं आहे.