भारतीय रेल्वेने सुरू केलेल्या प्रीमियम ट्रेनला अव्वाच्या सव्वा तिकीट दरांमुळे प्रतिसाद मिळत नव्हता. हे लक्षात घेऊन रेल्वेने आता प्रीमियम ट्रेनच्या तिकीट दरांचा लगाम खेचत प्रवाशांना खुश करण्याचा प्रयत्न केला आहे. यानुसार आता प्रीमियम ट्रेनच्या दरांमध्ये वेगाने वाढ होणार नाही.
प्रीमियम ट्रेनच्या तिकिटांचे दर हे विमानांच्या तिकिटदरांपेक्षाही महाग जात असल्याने प्रवाशांनी या ट्रेनकडे पाठ फिरवली. अखेर रेल्वेने प्रीमियम ट्रेनच्या तिकीट दर यंत्रणेत बदल करण्याचा निर्णय घेतला. त्यामुळे तिकिटांचे दर आटोक्यात आणण्यासोबच आता प्रीमियम ट्रेनचे तिकीट केवळ ऑनलाइन नाही तर तिकीट काऊंटरवर देखील उपलब्ध होणार आहे. तसेच या ट्रेनचे तिकीट आता १० दिवसांऐवजी एक महिना अगोदर बूक करता येण्यासंदर्भात विचार सुरू आहे. तसेच प्रवाशाने तिकीट रद्द केल्यास काही रक्कम परत करण्यासंदर्भात देखील विचार सुरू असल्याचे समजते. येत्या जुलैपासून प्रीमियम ट्रेनच्या तिकीट दर प्रणालीत हे बदल होण्याची शक्यता आहे.
रेल्वेच्या अधिकाऱ्यांच्या माहितीनुसार ज्या मार्गावर गेल्या वर्षी ९० टक्क्यांहून अधिक जागा आरक्षित झाल्या होत्या त्याच मार्गावर प्रीमियम रेल्वे चालवण्यात यावी, यावर विचार सुरू आहे. तसेच प्रीमियम ट्रेन परतताना तत्काळ म्हणून चालवायची की सामान्य ट्रेन म्हणून याचा अधिकार झोनल अधिकाऱ्यांना देण्यावरही विचार सुरू आहे.
तसेच आजही भारतात ऑनलाइन तिकीट बुकिंग पेक्षा तिकीट काऊंटरवरून तिकीट बूक करणाऱ्यांची संख्या मोठी आहे. त्यामुळे प्रीमियम ट्रेनचे तिकीट आता काऊंटरवर देखील उपलब्ध करून देण्याचा विचार सुरू आहे.