नसरापूर येथील तीन वर्षीय चिमुकलीच्या मृतदेहाचे शवविच्छेदन अहवाल, वैद्यकीय दाखले आणि तिच्या शरीरावरील जखमांचे सविस्तर विश्लेषण करून त्या ३९ मिनिटांत झालेल्या अत्याचारांचे पुरावे विशेष सरकारी वकील अजय मिसर यांनी न्यायालयात मांडले. ‘सीसीटीव्ही फुटेज, ‘डीएनए’चा अहवाल आणि अन्य पुराव्यांच्या आधारे आरोपीचा खोटेपणा उघडा पाडताना संपूर्ण दोषारोप सिद्ध करून त्याला कठोर शिक्षा व्हावी,’ अशी मागणी ॲड. मिसर यांनी न्यायालयाकडे केली. या प्रकरणाचा येत्या २५ जूनला निकाल लागण्याची शक्यता आहे.
चिमुकलीचे अपहरण, लैंगिक अत्याचार आणि हत्या प्रकरणातील आरोपी भीमराव कांबळे याने पीडितेला दुपारी तीन वाजून १२ मिनिटांनी घटनास्थळाकडे नेले. त्यानंतर, दुपारी तीन वाजून ५१ मिनिटांनी तो त्याच घटनास्थळावरून एकटाच परत येत असल्याचे सीसीटीव्ही फुटेजमधून दिसते. या तांत्रिक पुराव्यावरून पीडिता ही तब्बल ३९ मिनिटे आरोपीच्या ताब्यात होती, हे सिद्ध होते. यादरम्यान, त्याने पीडितेवर अत्यंत पाशवी अत्याचार व अनैसर्गिक संभोग केला. त्यानंतर, तिची निर्घृण हत्या करून मृतदेह लपवून ठेवला, अशी माहिती विशेष सरकारी वकील मिसर यांनी न्यायालयाला दिली.