मुंबईतील दादर प्लाझा परिसरात झालेल्या भीषण बेस्ट बस अपघाताने दोन कुटुंबांवर शोककळा पसरली आहे. रोजच्या कामासाठी घराबाहेर पडलेल्या दोन तरुणांचे आयुष्य एका क्षणात संपुष्टात आले, तर अनेक जण गंभीर जखमी झाले. मृतांपैकी एक असलेल्या 23 वर्षीय नियाज अहमद शेख याची कहाणी मन हेलावून टाकणारी आहे. काही दिवसांतच गावी जाऊन लग्नाच्या तयारीला सुरुवात करायची होती, पण त्याआधीच काळाने त्याच्यावर झडप घातली.
कामावर जाताना झाला मृत्यू
मूळचा उत्तर प्रदेशातील असलेला नियाज शेख गेली पाच वर्षे मुंबईत राहत होता. कुटुंबाच्या उदरनिर्वाहासाठी तो दिवसरात्र मेहनत करत होता. स्विगीमध्ये डिलिव्हरी पार्टनर म्हणून काम करणारा नियाज नळबाजार परिसरात वास्तव्यास होता. मंगळवारी सकाळीही तो नेहमीप्रमाणे डिलिव्हरीसाठी घराबाहेर पडला होता. मात्र हा त्याचा शेवटचा प्रवास ठरला. दादर प्लाझा परिसरातून जात असताना भरधाव बेस्ट बसने त्याच्या दुचाकीला जोरदार धडक दिली. या अपघातात त्याचा जागीच मृत्यू झाला.
लग्नाचे स्वप्ने अपूर्णच राहिली
नियाजच्या कुटुंबीयांनी दिलेल्या माहितीनुसार, तो येत्या 17 जून रोजी गावी जाणार होता. कुटुंबात लग्नाची तयारी सुरू होती आणि पुढील दोन ते तीन महिन्यांत त्याचा विवाह होणार होता. आयुष्याची नवी सुरुवात करण्याची स्वप्ने तो पाहत होता. मात्र एका क्षणात सर्व काही संपले. घटनेनंतर नातेवाईकांनी व्यक्त केलेल्या भावना हृदय पिळवटून टाकणाऱ्या आहेत. “घरासाठी, कुटुंबासाठी तो सतत कष्ट करत होता. लग्नाची तयारी सुरू होती. आता आम्ही कोणाकडे पाहायचे?” असा प्रश्न कुटुंबीयांनी उपस्थित केला.
नेमका कसा झाला अपघात?
प्राथमिक माहितीनुसार, प्लाझा ते काळाकिल्ला मार्गावरील 463 क्रमांकाची बेस्ट बस पहिल्या फेरीसाठी डेपोतून बाहेर पडत होती. बसमध्ये चालक, वाहक आणि बेस्टचे निरीक्षक उपस्थित होते. बस सुरू करताना हँडब्रेक काढल्यानंतर वाहन अचानक वेगाने पुढे सरकल्याचे सांगितले जात आहे. चालकाने ब्रेक व्यवस्थित काम करत नसल्याचा दावा केल्याचीही माहिती समोर आली आहे.
नियंत्रण सुटलेल्या बसने समोरून जाणाऱ्या पादचाऱ्यांना आणि वाहनांना धडक दिली. पुढे मोठी दुर्घटना टाळण्यासाठी चालकाने बस प्लाझाच्या दिशेने वळवण्याचा प्रयत्न केला, मात्र तोपर्यंत नुकसान झाले होते.