खेळताना गळफास बसून चिमुरड्याचा मृत्यू

वाढत्या वयातील मुलांकडे जरासं दुर्लक्षही कसं नकळत त्यांच्या जीवावर बेतू शकतं याचं ज्वलंत उदाहरण मुंबईच्या कांजूरमार्गमध्ये पाहायला मिळालं आहे. आई-वडिलांच्या अनुपस्थितीत घरात खेळताना गळफास बसून 11 वर्षांच्या चिमुरड्याचा मृत्यू झाला आहे.
मुलांचे वडील कामानिमित्त बंगळुरुला असतात तर एका सभारंभाच्या तयारीसाठी आई बाहेर गेली असताना ही दुर्घटना घडली. रविवारी दोन मुलांना बाहेरुन लॉक लावून आई कामासाठी गेली होती. त्यावेळी दोघे भाऊ घरात नेहमीप्रमाणेच आईच्या ओढणीने दहीहंडीचा खेळ खेळत होते.
ओढणी बांधून दुसरे टोक छताच्या पाईपला बांधले आणि 11 वर्षांच्या चिकू म्हणजेच सोहमने झोका घेतला. मात्र हा झोकाच त्याच्या जीवावर बेतला. गळ्यात अडकवलेल्या ओढणीचा सोहमच्या गळ्याला फास बसला आणि जागेवरच त्याचा मृत्यू झाला.

कांजूरमार्ग पोलीस स्टेशन पुढील कारवाई करत आहेत. या घटनेतून आपल्या मुलांना डोळ्यात तेल घालून जपा हाच संदेश पुन्हा एकदा अधोरेखित होत आहे.