अभिनेता विशाल ठक्करच्या विरोधात बलात्काराचा गुन्हा दाखल

एका टीव्ही अभिनेत्रीवर बलात्कार केल्याप्रकरणी एका बॉलिवूड अभिनेत्याविरोधात गुन्हा दाखल करण्यात आला आहे. विशाल ठक्कर असे या अभिनेत्याचे नाव आहे. विशाल ठक्करविरोधात बलात्काराचा गुन्हा दाखल करण्यात आल्याची माहिती चारकोप पोलिस ठाण्याचे वरिष्ठ पोलिस निरीक्षक रामचंद्र गायकवाड यांनी दिली.

बलात्कार पीडित अभिनेत्रीने अनेक टीव्ही मालिकांमध्ये काम केलं आहे. या पीडित अभिनेत्रीने अभिनेता विशाल ठक्करवर आरोप केले आहेत की, विशालने घरात घुसून बलात्कार केला. पीडित अभिनेत्रीच्या तक्रारीवरुन पोलिसांनी विशालवर आयपीसी कलम 376 (बलात्कार), 420 (फसवणूक), 323, 509 आणि 506 अन्वये गुन्हा दाखल केला आहे.

अभिनेता विशाल ठक्करला पोलिसांनी अद्याप अटक केलं नाही. विशालने टँगो चार्ली आणि चाँदनी बार या सिनेमात लहान भूमिका केली होती. शिवाय, ‘तारक मेहता का उलटा चष्मा’  या मालिकेतही विशालने भूमिका साकारली होती.