‘म्हाडा’ जमीन फसवणूक घोटाळ्यात पोलिस कोठडीत असलेला संशयित नायब तहसीलदार नितीन पाटील याच्या कारनाम्यांचा भांडाफोड दोन तलाठ्यांनी केल्याची धक्कादायक माहिती आहे. दोन तलाठ्यांनी पोलिसांत दिलेल्या जबाबानुसार पाटीलविरोधातील पुरावे संकलित झाले आहेत. पाटील याने घोटाळ्यातील ४९ पैकी ३१ प्रकरणांमध्ये बनावट नकाशांद्वारे मंजुरी देण्याची सूचना तलाठ्यांना केली होती. त्यानुसार पाटील याला अटक झाली असून उद्या, बुधवारी (दि. ६) त्याला पुन्हा न्यायालयात हजर करण्यात येईल.
नाशिकमधील ‘म्हाडा’च्या जमिनींवरील आरक्षणात झालेल्या बनावटगिरीबाबत दोन महिन्यांपासून नाशिक पोलिस आयुक्तालयाचे विशेष तपास पथक (एसआयटी) तपास करीत आहे. सहाय्यक पोलिस आयुक्त संदीप मिटके आणि वरिष्ठ पोलिस निरीक्षक डॉ. अंचल मुदगल यांच्या पथकाने शनिवारी (दि. २) रात्री उशिराने नायब तहसीलदार नितीन पाटील याला ताब्यात घेतले.
या गुन्ह्यात १६ मार्च रोजी दिनेश कन्हैय्यालाल उर्फ सोनू मनवानीला अटक झाली होती. न्यायालयीन कोठडीनंतर मिळालेल्या सशर्त जामीनावर मनवानी काही दिवसांपूर्वीच कारागृहाबाहेर आला. तर २३ एप्रिल रोजी बांधकाम व्यावसायिक दीपक भगवानदास करमचंदानी याला अटक झाली होती. त्यानंतर आता ३ मे रोजी नायब तहसीलदार पाटील याला अटक झाली असून, अजूनही बरेच संशयित अटकपूर्व जामीनासाठी धावधाव करत आहेत.
अठरा प्रकरणांचाही तपास सुरू
नायब तहसीलदार नितीन पाटील हा सन २०२२ पासून नाशिकमध्ये नियुक्त आहे. त्याने तलाठी व इतरांवर दबाव आणत संशयित बांधकाम व्यावसायिक, विकासकांकडे असलेले जमिनीचे बनावट नकाशे मंजूर करण्यास भाग पाडले. त्याने ३१ प्रकरणांना या स्वरूपात मंजुरी दिल्याचे तपासात समोर आले आहे. उर्वरित अठरा प्रकरणे कोणामार्फत मंजूर झाली, बनावट नकाशे कोणाकडे तयार व्हायचे, महसूल, भूमी अभिलेख, तलाठी व तहसील कार्यालयांसह दुय्यम निबंधक कार्यालये व महापालिकेतील अधिकाऱ्यांचा त्यामध्ये समावेश आहे का, याबाबत पोलिस तपास करीत आहेत.